Izolimi i dy deputetëve të pushtetit, për shkak të rezultatit pozitiv me virusin korona, e ka lënë Kuvendin pa shumicë të thjeshtë prej 61 deputetësh. Kjo ka hapur debatin për mundësinë që Kuvendi të punojnë online. Ideja fillestare është që online të jenë vetëm deputetët e infektuar, që kanë vendim për izolim, tregon deputeti Jovan Mitreski.
“Pra jo të gjithë deputetët. Të tjerët të mund të punojnë me prani fizike. Ne tani kemi 2 deputetë që kanë vendim për izolim megjithatë nuk kemi informacion se çfarë do të ndodhë me të tjerët në të ardhmen, ja nëse kanë pasur kontakt me këta dy deputetë, mos ndodhta në të ardhmen do të paraqiten edhe deputetë të tjerë që mund të jeni pozitivë, prandaj nuk guxojmë të rrezikojmë”, tha Jovan Mitreski nga LSDM.
Që e gjithë seanca të bëhet online kërkon konsensus mes të gjitha partive parlamentare, por tani për tani, dy deputetët e infektuar të pushtetit, në seancë do të marrin pjesë online, zbulon për TV21 deputeti i BDI-së, Izet Mexhiti.
“Në këtë rast që të mos e komplikojmë, të mos i mundojmë pacientët (deputetët) që të lëvëzin nga spitali apo atje ku kurohen e të vijnë në seanca parlamentare, ne u mundësojmë vetëm këtyre dy deputetëve që në mënyrë online të jenë pjesë e parlamentit dhe të ushtrojnë detyrën për të cilën janë votuar nga qytetarët”, u shpreh Izet Mexhiti nga BDI.
Kjo nënkupton se Kuvendit nuk do t’i mungojnë dy vota të shumicës, që të paktën të arrihen votimet me shumicë të thjeshtë prej 61 votash. Kjo edhe është arsyeja pse pushteti insiston në seanca kuvendore online, shprehet deputeti i VMRO-DPMNE-së, Nikolla Micevski.
“Arsyeja e vetme se pse e kërkojnë është numri dhe mbështetja e vogël prej 62 deputetësh, më e vogla në histori, që e ka kjo shumicë për formimin e qeverisë. Kuvendi në bazë të Kushtetutës dhe rregullores, punon në seanca parlamentare me prani fizike të të gjithë deputetëve, ndërsa jemi të gatshëm të marrim pjesë dhe të japim mbështetje të plotë, megjithatë për zgjidhje ligjore që me të vërtetë do të thonë përmirësim të kushteve, përballje me pandeminë, rritje të sigurisë ekonomike dhe të qytetarëve, e jo në sjelljen e ligjeve të caktuara që japin mundësi vepra korruptive”, theksoi Nikolla Micevski nga VMRO-DPMNE.
Edhe opozita shqiptare shprehet se do të mbështesin ligjet që do të përmirësonin krizën që sjellë pandemia, por deputeti Skender Rexhepi thotë se për të gjitha këto do të duhet të ketë kompromis pushtet-opozitë. Janë kundër që parlamenti të kaloj tërësisht online.
“Çështja e rëndë ekonomike-sociale është doemos është të tejkalohet me masat e ndërmarra, megjithatë për këto masa duhet të ketë kompromis dhe konsensus mes të gjitha subjekteve politike në kuvend. Ideja online gjithsesi e vdes demokracinë dhe në këtë rast ne nuk do të pajtohemi asnjëherë të ketë seanca online. Ka pasur të sëmurë, ka pasur aksidente, e raste të ndryshme, megjithatë ata kanë ngelur në spital e Kuvendi ka vazhduar punën”, potencoi Skender Rexhepi – ASH-AAA.
Drejtori i Qendrës për Shëndet Publik, Aleksandar Stojanov, ka deklaruar për Agjencinë nacionale të lajmeve, se asnjë deputet ose i punësuar në shërbimet parlamentare nuk do të shkojë në izolim për shkak të Kovid-19, pasi ishte njoftuar se dy deputetë dolën pozitivë me virus.
TV21 sot u përpoq të marrë qëndrim nga Kuvendi se si do të vazhdojë puna, por tani për tani nuk ka përgjigje.