“Jemi në fshatin Nikushtak të komunës së Likovës. Prapa meje mund të shihni deponinë e cila ekziston tanimë shumë vite me radhë. Këtu hidhen mbeturinat dhe të njëjtat digjen. Nga djegia e tyre, tymi që shkaktohet del në rrugën kryesore. Për shkak të këtij tymi, pikërisht para dy ditëve ndodhi një aksident mes dy veturave të cilat përfunduan të djegura, fatmirësisht, pa viktima. Me këtë deponi menaxhon ndërmarrja publike “Pishat” e cila funksionon në kuadër të komunës së Likovës. Le t’i pyesim se çfarë ndërmerr kjo ndërmarrje lidhur me mirëmbajtjen e kësaj deponie. Kush i hedhë këtu mbeturinat dhe si trajtohen ato?”, raporton Zekirija Haxhiu, gazetar i TV21.
“Deponinë ne e mirëmbajmë me të gjitha mundësitë e tona, maksimalisht që i kemi. Pastrohet rregullisht. Por fatkeqësisht ka njerëz të papërgjegjshëm që hedhin mbeturina vend e pa vend dhe të njëjtat i ndezin. Ne si ndërmarrje si veprimtari e kemi grumbullimin dhe transportimin e mbeturinave. Me tre automjetet tona, mbeturinat nga territori i komunës i hedhim atje. Atje e kemi deponinë dhe e mirëmbajmë të njëjtën”, tha Valdete Ramadani, Ndërmarrja Publike “Pishat”.
Kjo deponi tanimë një kohë të gjatë duheshte të largohet tërësisht ose së paku të rrethohet me mur. Por pse nuk është rrethuar apo dislokuar, tregon kryetari i komunës së Likovës, Erkan Arifi.
“Sa i përket murit, ne kemi bërë projektin, mirëpo për shkak se është në fazë të mbylljes së furnizimit publik fabrika për riciklim në rajonin veri-lindor ku përfshihet dhe komuna jonë, procedurë kjo e ministrisë për ambient jetësor, ne jemi të detyruar të presim. Nëse e shohim se zgjatë shumë, do të jemi të detyruar ta ndërtojmë murin”, tha Arifi.
Por çfarë thonë nga Ministria për Ambient Jetësor? Deri ku është procedura e ndërtimit të kësaj fabrike dhe a kanë kryer inspektim te deponia në Nikushtak?
“Kompetencë për menaxhim me deponinë është komuna, ndërsa inspektim pas denoncimeve mund të bëjë inspektorati shtetëror për ambient jetësor. Për rastin që përmendni nuk ka arritur asnjë denoncim as njoftim deri te ministria, e as deri te inspektorati shtetëror. Fabrika do të bëhet, ende nuk ka filluar, duhet për një muaj të shpallet thirrja për përzgjedhjen e kompanisë. Këto janë IPA fonde nga Bashkimi Evropian”, tha Kaja Shukova, ministre e Ambientit Jetësor.
Përndryshe kjo deponi nuk është e vetmja në këtë rajon. Në hyrje të fshatit Grushinë të komunës së Haraçinës ndodhet edhe një deponi tjetër me mbeturina, dhe atë, shumë afër varrezave të dëshmorëve.