Deklarimi i etnisë dhe fesë nga familjarët! Halili: Nuk është e ndaluar sepse asnjë Ligj nuk e ndalon

Aspak nuk qëndron ideja se përkatësia etnike, fetare si dhe gjuha të mos munden të deklarohen nga familjarët ose të afërmit e atyre që nuk janë prezent në momentin e regjistrimit, vlerëson ish-deputeti dhe ish-ambasadori, Muhamet Halili, i cili që nga viti 1981 ka kaluar disa procese regjistrimi, duke qenë i përfshirë edhe drejtpërdrejt në procese. Ligji nuk funksionon me teket e ndokujt, e nëse dikush është i pakënaqur me ligjin, ka ende kohë të ankohet në Gjykatën Kushtetuese shton ai. Në vijim ndjekim një deklaratë të tij, ndërsa intervistën e plotë do të keni mundësi ta ndiqni pas këtij edicioni informativ.

 “Manipulimet e llojit se kategoria e përkatësisë etnike, fetare dhe gjuhësore është e ndaluar të komunikohet nga një person i dytë nuk qëndrojnë fare sepse po të ishte kjo gjë e ndaluar me ndonjë ligj tjetër, për shembull ligjin për mbrojtjen e të dhënave personale, atëherë në ligjin ekzistues domosdoshmërish është dashur ta parasheh këtë ndalesë në ligjin ekzistues si dhe në metodologjinë ekzistuese”, deklaroi për TV21, Muhamet Halili – analist.