Debati në Click Plus – “S’ka më zë kritik”! Xhaferi: Kush thotë se kemi drejtësi, le të flet me familjen e Almirit

TË FUNDIT

Njëri prej frontmenëve gjatë protestave të Revolucionit të larmë Zamir Memeti thotë se nuk është pishman se ka protestuar për të rrëzuar Qeverinë e atëhershme të Gruevskit. Shton se qëllimi i tij gjatë protestave nuk ka qenë për tu punësuar në institucion shtetëror, por për të pasur drejtësi në vend. 

 “A janë bërë gabime, po janë bërë gabime të mëdha. Ka gabime të mëdha. A janë të plotësuar të gjitha kërkesat? Jo, derisa Nikolla Gruevski nuk është në burg nuk mundet me qenë parulla pa drejtësi s’ka qetësi”, tha Zamir Mehmeti – ish-aktivist.

Ndërkohë gazetari Furkan Saliu thotë se për shkak të punësimeve të aktivistëve që ishin pjesë e Revolucionit të Larmë ka humbur zëri kritik por edhe besimi i qytetarëve te organizatat joqeveritare.

 “Ti je një person e ndikim që shumë njerëz kanë ardhur pas. Edhe e keni dëmtuar sektorin civil, saqë sot Zaevi e ka terrenin e lirë me bo çka do. I kalon edhe Rashkovski, pasaportat, i kalon gjithçka për shkak se është mbyt zëri kritik. S’ka më zë kritik”, u shpreh Furkan Saliu – gazetar.

Arjanit Xhaferi nga Eco Guerila thotë se gjerat nuk kanë ndryshuar shumë, pasi siç thotë, gruevizmi vetëm është zëvendësuar me zaevizëm.

 “Unë takoj çdo ditë njerëz që thotë se po bëhet akoma më keq. Sepse ne shkulëm Gruevskin, por nuk shkulëm gruevizmin. Ne e zëvendësuam me zaevizëm. Kjo është për të ardhur keq. Paqe ka por drejtësi nuk ka, akoma dhe kushdo që thotë se ka le të shkoj le të flas familjes së Almirit”, deklaroi Arjanit Xhaferi – EkoGuerilla.

E aktivisti Valon Bela thotë se sistemi juridik jo që është reformuar, por është bërë edhe ma keq.  

 “Sa i përket sistemit juridik, prokurorisë gjyqësisë dhe elementet e hetuesisë unë mendoj se është më keq se sa në kohën e Gruevskit. Pse? Sepse tani nëse atëherë ka qenë pjesërisht i kapur sistemi juridik, tek ne tani është 100% i kapur”, shtoi Valon Bela.

Metin Muharremi mendon se të rinjtë e vendit janë pasiv duke pritur punësim nga partitë politike.

 “Mbi 60% e të rinjve nuk besojnë se mund të ndikojnë në shoqëri pra është një pasivitet shumë i madh i të rinjve. Mënyra e vetme për punësim për ta është përmes partive politike”, potencoi Metin Muharemi – aktivist CEO.

Në emisionin Click Plus gjithashtu u tha se është shuar aktivizimi shoqëror, ndërsa dominon oportunizmi politik.