Debat i tensionuar për Ligjin për shtetësi, Ramçilloviq shpërndau kopje të personave pa shtetësi

TË FUNDIT

Debat i nxehtë dhe shumë vërejtje procedurale. Kështu vijoi diskutimi në Komisionin për çështje evropiane ku në rend të ditës u gjend Ligji për shtetësi i cili kësaj here nga Qeveria është sjellë me flamur evropian. Opozitarja VMRO-DPMNE vazhdimisht kërkonte procedurale me çka u pamundësua miratimi i rendit të ditës. Debati u nxeh pasi që deputeti Zekir Ramçilloviq i dha deputetes Marija Petrushevska kopje të kërkesave të personave që kërkojnë shtetësi.

“Do të më interesojnë…po….absolutisht. Shikoni, kolegu që votoi për ndryshimet kushtetuese në mënyrë definitive dëshiron të arsyetojë tradhtinë por kjo assesi nuk mund të lahet”, tha Marija Petrushevska.

Profesoresha Gordana Siljanovska thotë se nuk ka asnjëfarë baze që ky Ligj të ketë flamur evropian.

“Neni 178 i Ligjit që ka të bëjë me procedurën e shkurtër kur është në pyetje harmonizimi me legjislativen e BE-së dhe në paragrafin e fundit thotë – kjo nuk është në mënyrë automatike  por nëse nuk janë në pyetje harmonizime voluminoze dhe të komplikuara të Ligjit me të drejtën e BE-së. As që ka këtu harmonizim me të drejtën e BE-së, por të jem e sinqertë shtetësia është një institut shumë i komplikuar”, tha Siljanovska.

Opozita i kërkoi në shqyrtim të gjithë amendamente që janë parashtruar, por nga shumica parlamentare insistuan që së pari të verifikohet rendi i ditës që të fillojë të kalojë koha prej tre ditëve për debat. Skender Rexhepi nga Aleanca për Shqiptarët- Alternativa, i thirri deputetët që të miratojnë ligjin.

“Të zgjidhet problemi i atyre që duhet, nuk duhet të kryejmë tensione politike, nuk duhet të mendojmë se numri i shqiptarëve do të rritet në Regjistrimin e popullsisë. Kjo u dëshmua, vetëm 20% e shqiptarëve janë në diasporë, ne nuk kemi nevojë që ta dëshmojmë numrin. Mos e ushqeni shovinizmin te njerëzit”, deklaroi Rexhepi.

Ligji për shtetësi ka flamur evropian dhe sillet me procedurë të shkurtuar. Me të parashihet që shtetësi të mund të merret me parashtrimin e dokumenteve personale, certifikatë të lindjes, librezë pune, fletë-pronësi, fatura për obligimet komunale, librezë shëndetësore, tatime të paguara si dhe disa dokumente të tjera.