Qeveria të gjejë zgjidhje që çmimi i energjisë elektrike të ulet, aq më tepër tani në kohë pandemie, kërkon opozita shqiptare! E pushteti ngre duart lart duke thënë se nuk mund të përzihet në Komisione të pavarura, siç është ai Rregullator për Energjetikë! Ky debat i nxehtë u zhvillua mbrëmë në “ClickPlus” mes ministrit të Ekonomisë, Kreshnik Bekteshi, dhe deputetes opozitare, Ilire Dauti, nga kolaicioni “Tash është koha!”.
Ilire Dauti- “Nuk ka nevojë të lodheni për të gjetur modalitete si të ju ndihmojmë qytetarëve! Ja ndihmojini konkretisht te çmimi i energjisë elektrike! 18% e ka TVSH-në energjia elektrike!
Kreshnik Bekteshi- Si formohet çmimi i energjisë elektrike?!
Ilire Dauti- Formojeni si të doni! Vetëm qytetarit fatura t’i shkojë…
Kreshnik Bekteshi- Po nuk mundemi ta formojë si të duam…kur pretendojmë të integrohemi në BE dhe thirreni në Komision të pavarur, të zgjedhur nga ish-kolegët tuaj dhe ai Komision është i pavarur rregullator!”
E me rritjen e çmimit të energjisë elektrike, duket se tani për tani, kompanitë shpërndarëse të rrymës janë të kënaqura.
Kryetari i Komisionit rregullator për Energjetikë pohon se deri më tani kompanitë nuk kanë dorëzuar ndonjë kërkesë për ndryshim të çmimeve.
“Vendimet tona mund të ndryshohen nëse kompanitë dorëzojnë kërkesë me të dhëna të reja deri te Komisioni rregullator për Energjetikë. Deri më tani kompanitë nuk kanë dorëzuar asnjë lloj të dhëne, andaj edhe nuk kemi informacion tjetër”, deklaroi Marko Bislimovski – Kryetar i Komisionit Rregullator për Energjetikë.
Bislimovski shpjegon se Komisioni nuk mund të sjellë vendime që do t’i çonte kompanitë energjisë në humbje, e nëse këto të fundit ndryshojnë mendje për çmimin e energjisë, Komisioni është i gatshëm të ndryshojë vendimet në çdo moment.
“Me ligjin për energjetikë parashihet që çdo kompani të ketë fitimin e saj. Vendimet tona i mbajtën kompanitë në kondicion që të punojnë në zero pozitiv. Nëse kompanitë janë të gatshme të punojnë në humbje, ne jemi të gatshëm t’i ndryshojmë vendimet në afat 24 orësh pas dorëzimit të të dhënave nga ana e kompanive”, theksoi Kryetari i Komisionit Rregullator për Energjetikë, Marko Bislimovski.
Rritja e çmimit të energjisë elektrike për 7.4% ka sjellë protesta në disa qytete të vendit. Ka protestuar po ashtu edhe opozita, megjithatë asnjëra prej tyre deri më tani nuk e ka lëkundur vendimin e Komisionit rregullator, e as Qeverinë që të ndërmarrë diçka për të parandaluar këtë gjë. E gjitha që thonë nga Qeveria është se nuk mund të përzihen në vendimet e Komisioneve që janë të pavarura.