Çmimi i rrymës nuk do të rritet më shumë se 10%! Bytyqi: Edhe pas 1 janarit çmimi i rrymës do të jetë më i ulëti në rajon

Çmimi i energjisë elektrike pas 1 janarit nuk do të rritet aq sa po thonë disa media, garanton zëvendëskryeministri për Çështje Ekonomike Fatmir Bytyqi duke shtuar se edhe në vitin e ardhshëm vendi do të ketë çmimi më i ulët në rajon.

 “Garantoj se në janar çmimi nuk do të rritet në nivelin në të cilin disa mediume, ose individë duan ta tregojnë për të krijuar frikë te populli. Ne ashtu siç dëshmuam më 1 korrik edhe më 1 janar do të dëshmojmë se çmimi do të jetë  ende më i ulëti në të gjithë rajonin dhe do të sigurojmë  energji elektrike të mjaftueshme që të vazhdojë të rrjedhë jeta normale ashtu siç duhet”, tha Fatmir Bytyqi – zëvendëskryeministër për Çështje Ekonomike.

Bytyqi këtë e thotë pasi në disa media dje u tha se pas 1 janarit çmimi i energjisë elektrike do të rritet për 38%. E Ministri i Ekonomisë Kreshnik Bekteshi sot tha se mbetet i qëndrimit se rritja e çmimit të rrymës do të jetë deri në 10 për qind.

 “I qëndroj asaj që e kam thënë dhe do të presim deri në fund të muajit për të parë se cili do të jetë vendimi i KRRE-së. Ne i kemi bërë të gjitha analizat dhe kam qenë i përfshirë unë si ministër i Ekonomisë dhe institucionet tjera – kompanitë energjetike si EMV, EVN, MEPSO dhe sipas analizave tona mbetem në qëndrimin që kam thënë. Nëse duhet ta përsëris, e përsëris: Nuk do të ketë rritje më shumë se 10 për qind”, deklaroi ministri i Ekonomisë, Kreshnik Bekteshi.

Bytyqi theksoi se Qeveria po mundohet të gjejë zgjidhje sistematike për energjinë elektrike. Nga ana tjetër, ministri Bekteshi tregoi se tashmë kanë filluar të bëhen modele të reja në pjesën e përcaktimit të çmimit të rrymës me modelin e bllok tarifave për të nxitur qytetarët që të kursejnë energjinë elektrike.