Çmimet e naftës janë rritur këtë mëngjes për shkak të pasigurisë rreth perspektivave për gjetjen e një zgjidhjeje të konfliktit në Lindjen e Mesme, ndërsa nafta e papërpunuar Brent arriti në 93,01 dollarë për fuçi.
Kontratat futures për naftën Brent me dorëzim në muajin gusht në bursën londineze ICE Futures u tregtuan me 93,01 dollarë për fuçi, ose 1,89 dollarë më shumë krahasuar me mbylljen e mëparshme.
Ndërkohë, kontratat futures për naftën WTI me dorëzim në korrik në sesionin elektronik të bursës NYMEX në Nju Jork u rritën me 2,21 dollarë, duke arritur në 89,57 dollarë për fuçi.
Gjatë fundjavës, SHBA-ja dhe Irani shkëmbyen propozime për një draft-marrëveshje që synon vazhdimin e armëpushimit dhe rihapjen e Ngushticës së Hormuzit, por niveli i përparimit në bisedime mbetet i paqartë.
Presidenti amerikan, Donald Trump, përsëriti kërkesën e tij që Teherani të pezullojë programin bërthamor dhe të rikthejë plotësisht statusin e Ngushticës së Hormuzit si një arterie e hapur ndërkombëtare e transportit, sipas Trading Economics.
Megjithëse çmimet e naftës ranë gjatë muajit maj, ato mbeten dukshëm më të larta krahasuar me nivelet para shpërthimit të luftës.