Çka e nxiti Makronin të ndryshojë qëndrim?! Nga frenuese, në mbështetëse e fortë për Maqedoninë e Veriut

TË FUNDIT

Mesazhet për mbështetje të fortë ndaj Maqedonisë për hapje të rrugës drejt BE-së, që erdhën nga shefi i Francës, Emanuel Makron, i “ngrohi” shpresat se ka gjasa Maqedonia së shpejti t’i hapë negociatat. Makroni, i cili dje e mirëpriti kryeministrin e Maqedonisë, Zoran Zaev para Pallatit të Elise, tha se Maqedonia ka zbatuar reforma të rëndësishme në vitin 2017, prandaj, siç theksoi, duhet t’i nisë negociatat, kurse Franca personalisht do të kyçet në tejkalimin e kontestit me Bullgarinë fqinje.

“Maqedonia e Veriut duhet të hyjë në BE-në dhe e dini se Franca tërësisht ju mbështet në këtë rrugë. Ndonjëherë ndoshta keni menduar se jemi partner i komplikuar i cili po kërkon shumë, por unë dua të jem partner i sinqertë. Andaj ne vendosëm t’i hapim negociatat për anëtarësimin e vendit tuaj në mars të vitit 2020,megjithatë tani erdhi kohë që të konkretizohet ky vendim, ndërsa më vonë do të flasim për mënyrat se si të arrihet kjo dhe në mënyrë aktive e përkrah gjetjen e kompromisit me Bullgarinë”, deklaroi Makron.

Kryeministri Zaev u shpreh i kënaqur me përkrahjen e hapur të Francës duke thënë se për të është i pranueshëm propozimi portugez i cili nuk i prek çështjet e identitetit.

“Zgjidhjet e propozuara nga ana e kryesisë portugeze janë bazë e mirë, ndërsa Maqedonia e Veriut është e gatshme për dialog bilateral i cili do të sjellë marrëveshje të mençur dhe të pranueshme për të dyja palët në kuadër të Marrëveshjes për fqinjësi të mirë me Bullgarinë. Kjo do të thotë se çështjet e gjuhës dhe identitetit maqedonas nuk mund të jenë në tryezën e negociatave. Merci beaucoup monsieur president”, tha Zaevi.

Por, si e ndryshoi Makroni pozitën ndaj Maqedonisë, kur ai në tetor 2019 me vendosjen e metodologjisë së re praktikisht e bllokoi fillimin e negociatave me BE-në? Profesori Nano Ruzhin, i cili është njohës i mirë i zhvillimeve në Francë, tha se prej atëherë e deri më sot kanë ndodhur shumë gjëra që kanë ndikuar mbi ndryshimin e politikës së Makronit, njëra prej të cilave është qëndrimi i tepruar agresiv i Bullgarisë ndaj Maqedonisë.

“Diplomacia e Maqedonisë, para së gjithash Qeveria me një politikë të matur të mospranimit të konfliktit me të gjitha qëndrimet ekstreme, përveç asaj që e bënte opozita dhe disa intelektualë të caktuar, Qeveria ishte shumë neutrale, shumë e matur dhe nuk u ndesh me pozicionet bullgare. Gjëja e tretë dhe më e rëndësishme është qëndrimi i fundit i Bajdenit”, tha profesori Nano Ruzhin.

Me marrjen e mbështetjes nga Franca dhe duke pasur parasysh se e kemi Gjermaninë si mbështetëse e fortë, Maqedonia i ka dy fuqitë evropiane të cilat ia hapin rrugën drejt BE-së. Po a do të mjaftojë kjo që vendi së shpejti t’i nisë negociatat?

“Maqedonia e Veriut shumë shpejt do të lëvizë për shkak se të gjithë indikatorët e reformave janë të mirë dhe andaj po pritet efekt pozitiv. Nëse nuk arrihet zgjidhje tani, do të priten zgjedhjet në Bullgari. Është e rëndësishme të gjejnë zgjidhje për kontestin, kushtimisht thënë, mes Sofjes dhe Shkupit, punët e tjera do të vijnë vetvetiu. Edhe Gjermania edhe Franca e përkrahin Maqedoninë e Veriut për anëtarësim në BE-në”, shtoi Nano Ruzhin.

Edhe sot, mbështetje për fillimin e negociatave të vendit tonë me BE-në arriti edhe nga Stejt departamenti. Zëdhënësi Ned Prajs, përmes Twitterit, transmetoi se SHBA-të e përkrahin hapjen e negociatave për anëtarësimin e Maqedonisë së Veriut dhe Shqipërisë në BE-në pa prolongime. Po angazhohemi në nivelet më larta në Qeverinë që ta demonstrojmë përkushtimin tonë ndaj rrugës evropiane të vendeve aspirante, shkruhet në postim. Jo zyrtarisht, Ballkani Perëndimor do të jetë një prej temave në takimin e presidentit amerikan Xho Bajden me liderët e BE-së, javën e ardhshme në Bruksel.

TË NGJAJSHME