Nesër do të niset dërgesa e parë e naftës dizel ruse drejt SHBA-së, në bazë të marrëveshjes mes presidentit amerikan Donald Trump dhe homologut të tij rus, Vladimir Putin.
Zëvendëskryeministri rus, Aleksandar Novak, deklaroi se cisterna do të ketë kapacitet prej 40.000 tonësh, transmeton agjencia Interfax. Pas kësaj, priten edhe dërgesa të tjera. Ai nuk e përjashtoi mundësinë e eksportit të naftës dizel edhe në vende të tjera, por theksoi se kjo do të varet nga kapacitetet e rafinerive ruse në muajt e ardhshëm.
Trump dhe Putin, gjatë një bisede telefonike rreth dhjetë ditë më parë, u dakorduan për vazhdimin e dërgesave të naftës dizel ruse drejt SHBA-së. Uashingtoni i ka pezulluar sanksionet ndaj Moskës deri në prill të vitit 2027, për të mundësuar realizimin e këtyre dërgesave.
Marrëveshja shkaktoi reagime në Bashkimin Evropian dhe në Ukrainë, si dhe te disa kongresmenë republikanë, ndërsa në Moskë u prit me përshëndetje.
Rafineritë ruse janë shpesh objektiv i sulmeve me dronë me rreze të gjatë veprimi nga Ukraina. Dëmet e shkaktuara deri më tani kanë kufizuar kapacitetet prodhuese të vendit. Si kundërpërgjigje, Moska vendosi ndalimin e eksportit të naftës dizel dhe benzinës.
Sulmet ukrainase janë kritikuar nga Trump, i cili pretendon se Kievi është përgjegjës për rritjen e çmimeve të energjisë, në prag të zgjedhjeve për Kongresin amerikan në nëntor, ku republikanët pritet të kenë rezultat të dobët.
Nga ana tjetër, Kievi argumenton se objektet e naftës janë objektiva legjitime ushtarake, pasi sigurojnë karburant dhe financim për luftën e Putinit.