“Pyes! Pse nuk është ndërtuar objekti i ri shëndetësor dhe pse Buteli nuk ka poliklinikë? Qëllim i këtij objekti janë të gjithë qytetarët e Komunës së Butelit ndërsa do të kryhet deri në vitin 2020”, tha Velimir Smilevski – Kryetar i Butelit (21.10.2017)
01.30 = “Në vitin 2018 do të ketë ujë në Luboten”! Nuk është vetëm uji, në këtë fshat do të hapim edhe shkollë të re, do të ndërtojmë sallë sporti, do të hapim çerdhe, çdo gjë që i duhet qytetarit të ndihet mirë në çdo vend”, u shpreh Velimir Smilevski – Kryetar i Butelit (20.10.2017)
Kështu pyeste dhe premtonte kreu i tanishëm i Butelit, Velimir Smilevski, para se të vinte në krye të komunës.
Premtimet vazhduan edhe pasi u bë kryetar i Butelit, siç është ndërtimi i shkollës në Vizbeg, për të cilën para një viti tha se ndërtimi do të fillojë në 2020-tën.
“Mendoj që për një kohë të shkurtër, lënda do të jetë në duar të Ministrisë së Arsimit dhe Shkencës, kur them shkurtë mendoj deri në fund të muajit. Kështu që për një kohë të shkurtër do të jetë edhe procedura e tenderimit, mendoj që kjo procedurë do të përfundojë deri në fund të vitit dhe nga viti i ardhëshëm do të fillojë ndërtimi i shkollës”, deklaroi Velimir Smilevski – Kryetar i Butelit (23.09.2019).
Edhe tre muaj përfundon 2020-ta. Edhe dy muaj mbushen 3 vjet që kur Smilevski u bë kryetar i Butelit, e asnjë prej këtyre premtimeve ende nuk është realizuar!
Lubotenasit janë ende pa ujë! Shkolla e Vizbegut nuk është askund! Poliklinika po ashtu!
Për këtë dje edhe protestuan qytetarët e kësaj komune, duke shfaqur transparente në të cilat shkruhej “Smilevski na mashtroi”!
Smilevski me shpjegim për mosndërtimin e poliklinikës që e premtonte në 2017-n.
“Për momentin çështja është te Qyteti i Shkupit dhe shpresoj që për një muaj deri në një muaj e gjysmë të përfundojë në institucione. Për momentin komuna e Butelit po gjen mundësi që ambulancave ekzistuese t’i propozojë lokacione ku do të mund t’i lëvizin ordinancat e tyre që të mund të ndërtohet në atë vend poliklinika”, theksoi Velimir Smilevski – Kryetar i Butelit (26.09.2020).
Shpjegime të ngjashme ka pasur edhe për projektet e premtuara e të parelizuara deri më tani. Probleme me dokumentacionin, ngatërresa me planin urbanistik e procedura që akoma s’kanë mbaruar nëpër institucione të tjera.
I kërkuam kryetarit intervistë për të na treguar se çfarë është duke punuar për të mbajtur premtimet, por shkurt na tha se “për një muaj do të kemi prezantim për punën e bërë”.
Kreut të Butelit i mbetet edhe 1 vit deri në fund të mandatit për të realizuar premtimet e dhëna para butelasve! Zgjedhjet lokale pritet të mbahen në vjeshtë 2021!