Çfarë ndodhi sot në Kuvend? Përmbledhje përmes kronikës së TV21

Në mëngjes, sekretari gjeneral i Lëvizjes Besa ishte i sigurt se 3 deputetët e partisë do të votonin për rrëzimin e Qeverisë.

 “Deputetët e Besës sigurt votojnë për rrëzimin e Qeverisë?

Po, po…”, tha Arijanit Hoxha, sekretar gjeneral i Lëvizjes Besa.

I sigurt ishte edhe kreu i opozitares Aleanca për Shqiptarët Ziadin Sela.

 “Sot janë votat për të rënë qeveria dhe përfundimisht mendoj që do të lirohen qytetarët”, deklaroi Ziadin Sela, kryetar i ASH-së.

Po sa më shumë që kalonte koha, shihej jo të gjithë ata që kishin firmosur “pro” rrëzimit, do të vinin sot në Kuvend.

Deputeti i Besës, Kastriot Rexhepi, nuk u duk askund. Pas disa orësh, përmes Facebookut e sqaroi mungesën e tij dhe pse nuk do të votojë rrëzimin e Qeverisë “Zaev 2”.

 “Duke patur parasysh momentumin politik, pas shtyrjes të dorëheqjes nga kryeministri Zaev, për hir të procesit dhe sinjalet e forta nga partnerët strategjik SHBA dhe shtetet e BE-së që më janë komunikuar nga përfaqësues të lartë diplomatik, se në muajin dhjetor vëndi ka gjasa të mëdha të marrë datë për fillim e bisedimeve për anëtarësim në BE, vendosa që mos të marrë pjesë në seancën parlamentare ku duhej të merret vendim me të cilin do vihet në pikëpyetje ky pikësynim jetik kombëtar dhe shtetëror. Si politikan dhe deputet i përgjegjshëm, mora këtë vendim jo të lehtë duke i vënë interesin e popullit dhe shtetit në radhë të parë. Shteti në këtë periudhë të rëndësishme nuk ka nevojë për krizë politike dhe zhytje në ujëra të turbullta me plot të panjohura”, shkroi Kastriot Rexhepi nga Lëvizja Besa.

Pas këtij postimi, sekretari gjeneral i Besës, Arjanit Hoxha po ashtu në Facebook, shkroi se “kërcënimi, shantazhi apo format e tjera të ndikimit janë tregues për instalimin e një regjimi që është vënë mbi vullnetin e popullit”.

Kreu i VMRO-DPMNE-së e krahasoi me deputetin e ndjerë Amdi Bajram.

 “A do të ketë zëvendësin për Kastriot Rexhepin? Për Amdi Bajramin bashkëkohor (i qoftë i lehtë dheu)?”, tha Hristijan Mickoski, kryetar i VMRO-DPMNE-së.

Ndërsa ish-bashkëpartiaku në “Besë”, tash deputet i Alternativës, Skender Rexhepi, kishte 4 vite pa folur me të.

 “E mira është se e kemi ditur që njerëzit që tradhtojnë njëherë, do të vazhdojnë të tradhtojnë gjithmonë”, theksoi Skender Rexhepi, deputet i Alternativës.

Pas këtyre, kryetari i Besës, Bilall Kasami doli para gazetarëve duke thënë se dyshon se vendimi i Kastriot Rexhepit nuk është sipas vullnetit të tij.

 “-Mendoni se e ka kërcënuar dikush? -Dyshimet janë se ai pa vullnet e ka këtë qëndrim, deri sa nuk kemi të kundërtën dhe për këtë jam në komunikim me institucionet e vendit dhe ndërkombëtare.

-A e dini se ku ndodhet Kastriot Rexhepi? -Jo nuk kam informata se ku gjendet. -Kur është hera e fundit që keni komunikuar? -Dje kur kemi komunikuar në mënyrë shumë miqësore, kemi qenë në koordinim e sipër, nuk kam pasur ndonjë sinjal që deputeti në fjalë mund të bëjë ndonjë veprim të tillë me vullnetin e lirë”, tha Bilall Kasami nga Lëvizja Besa.

Nëse Rexhepi e konfirmon qëndrimin e tij me zë dhe figurë, Kasami paralajmëroi marrje masash në bazë të statutit të partisë.

E zëvendëskryeministri, Artan Grubi nga radhët e BDI-së, hodhi poshtë pretendimet që dikush e ka kërcënuar Rexhepin.

 “Kastrioti ka qenë gjithmonë i orientuar drejt BE-së, NATO-s, ShBA-ve. E kam pasur kolegë në ambasadën e Holandës, kemi punuar bashkë dhe ja di bindjet e tij të plota që zemra e tij fle në Uashington dhe Bruksel”, theksoi Artan Grubi, BDI.

Opozita mbetet me shpresën që deri në mesnatë do të sigurojë një deputet tjetër që do të votonte rrëzimin e Qeverisë.