Kandidati i VLEN-it për kryetar komune në Çair Izet Mexhiti, e prezantoi planin për arsim cilësor në këtë komunë, ai tha se së pari do të investojnë në arsimin parashkollor dhe fillor, ku edhe kanë siguruar mjete për ndërtimin e tre çerdheve të reja si dhe do të angazhohen për krijimin e kushteve për mësim tërëditor në shkolla, përcjell TV21. Mexhiti paralajmëroi që do të ndërtojnë salla sportive për nxënësit e shkollës fillore “Jashar Beu” dhe “Hasan Prishtina”.
“Do të ndërojmë shkollë të re fillore në lagjen “Teneçe Mëhallë” për 1300 nxënës me emrin “Viktoria”, për shkak se edhe kulla e ndërtimit është në formën V. Do të ndërtojmë shkollë të re për fëmijët me nevoja të veçanta “Ardhmëria” apo “Idnina” siç ishte, duke siguruar kushte më të mira dhe në vendin e njejtë do të ndërtohet edhe një shkollë e re fillore që do të quhet “Mit’hat Frashëri”. Do të zgjerojmë kapacitetet e shkollave fillore “Hasan Prishtina” dhe “Ismail Qemali”, për t’i dhënë fund klasave të stërngarkuara”, tha Izet Mexhiti, kandidat i VLEN-it për kryetar komune në Çair.
Kandidati i AKI-së për kryetar të Çairit, Bujar Osmani, prezantoi projektin infrastrukturor, “Sheshi Liria” dhe rrugën nëntokësore pranë “Çairçanjës”, që do të zgjidhte problemin më të madh të komunikacionit në Çair dhe do të krijonte një qendër moderne e funksionale urbane, përcjell TV21. Projekti “Sheshi Liria” dhe rruga nëntokësore, i përgatitur në bashkëpunim me arkitektin Mishel Rojkind, parasheh ndërtimin e një nënkalimi modern, që do të zhbllokonte plotësisht lëvizjen dhe do të lidhte Seravën dhe Gazi Babën.
“Zgjidhja të cilën ne e kemi propozuar është në fakt nën kalim, nën kalim në pjesën e Çairçanes dhe pastaj mbi të sheshin “Liria” që do të lidhë Seravën dhe Gazi Babën dhe do të krijoj një qendër sociale që do të jetë sheshi i dytë për nga madhësia pas sheshit “Skënderbeu” dhe do të krijon kushte për specializim dhe nga një trafik i ngarkuar që ndot ajrin çdo ditë nga ndalesat, do të kemi lëvizje fëmijësh, do të kemi lojëra për fëmijë do të kemi gjallërim të qytetit, funksionalitet të Komunës së Çairit”, tha Bujar Osmani, kandidati i AKI-së për kryetar të Çairit