Ç’do të ndodhë me anijet në Shkup? Një e mbyllur, një funksionale e një e shkatërruar

Gjysmë i shkatërruar, me dritare të thyera e dërrasa kudo. Kështu duket anija, e cila deri vitin e kaluar funksiononte si restorant.

Asnjë nga 3 anijet e vendosura në lumin Vardar ende nuk është larguar, edhe pse një gjë e tillë ishte premtuar nga ish kryetari i Qytetit të Shkupit, Petre Shilegov pasi siç tha ai paraqisnin rrezik. Njëra prej tyre është ende funksionale, ndërkaq procesi për largimin e të tjerave është bllokuar pasi që pronari ka paditur Qytetin e Shkupit.

Për të parë se deri ku është çështja gjyqësore kontaktuam edhe me drejtorin ekzekutiv të kompanisë që është pronare e anijes së demoluar, Zharko Milenkoski. Edhe pse fillimisht u dakorduam që deklaratën e tij ta incizojmë, më vonë na ktheu vetëm përgjigje me shkrim ku na informoi  se Gjykata që në seancën e parë vitin e kaluar kishte vendosur të bllokojë rrënimin, ndërsa seanca e ardhshme gjyqësore për këtë rast është caktuar për më 7 qershor.

A ishte mirë për Petre Shilegovin që filloi me rrënimin e anijes?

-Jo, sepse populli e dënoi.

A është mirë për shtetin?

-Jo, sepse do të duhet të paguajnë dëmshpërblim. Dëmi është mbi 1 milionë euro. Ne nuk duam ta dëmtojmë shtetin. Nëse e rikthejnë në gjendje siç ka qenë, patjetër që do të vazhdojmë me punë.

Për këtë çështje pyetëm edhe Qytetin e Shkupit, nga ku na thanë se për anijen e mbyllur procedura për largim është refuzuar nga ana e Gjykatës, ndërsa për anijen gjysmë të rrënuar janë duke u zhvilluar procedura gjyqësore.

QYTETI I SHKUPIT

“Për anijen tek “Holiday Inn” ka dokument ekzekutues të plotfuqishëm. Për të njëjtën nga ana e pronarit kundër Qytetit të Shkupit janë ngritur dy padi. Njëra ka të bëjë me ndërprerjen e kontratës, ndërsa tjetra për dëmshpërblimin nga rrënimi i shkaktuar nga procedurat e ngritura nga ana e Petre Shilegovit. Lënda për ndërprerjen e kontratës është në zhvillim e sipër, ndërsa lënda për dëmshpërblim është ndërprerë deri në rezultatin përfundimtar nga lënda për ndërprerje të kontratës”.

Ndryshe, kontrata me Qytetin e Shkupit është lidhur për periudhë 10 vjeçare, ndërsa prishja e njëanshme e kontratës shkakton pasoja, në këtë rast dëmshpërblim.

Kujtojmë se, këto anije janë pjesë e projektit Shkupi 2014, ndërsa për largimin e tyre u vendos pas studimit për zvogëlimin e rrezikut nga përmbytjet, i përgatitur nga UNDP, së bashku me Qytetin e Shkupit dhe Qendrën për Menaxhim me Kriza, ku thuhej se në Vardar nuk duhet të ndërtohen argjinatura, pengesa dhe objekte tjera, pasi që zvogëlojnë nivelin e rrjedhës së lumit.