Ky është vendi ku do të ndërtohet garazhi i parë në kate në komunën e Çairit.
Mbrapa poliklinikës së Bit Pazarit dhe afër Xhamisë Isa Beu.
Projekti ishte njëri prej premtimeve para zgjedhore për ta rregulluar kaosin në komunikacion në këtë komunë, që ka dhënë Visar Ganiu.
U deshën 3 vjet që Qeveria të miratoj ligj, i cili do të jep dritë jeshile për ndërtimin e garazhit në kate në vendbanimin me shumicë shqiptare në Shkup.
Më 13 janar, zëvendëskryeministri i parë Artan Grubi e promovoi përmes rrjetit social projektin e premtuar nga Visar Ganiu, dhe ligjin që miratoi Qeveria.
Kryetari i Çairit, që e kishte në “kontratën” e tij me qytetarët thotë se për ligjin nuk e njoftoi askush nga qeveria, por kabineti i tij e ka pa online.
Por, pse ai vet s’e promovoj, por bashkëpartiaku i tij nga qeveria?
“Kuptohet që me miratimin e kërkesës tonë në Qeveri është një plus i madh pasi që është edhe Artani prej Çairi mendoj që të gjithë kemi drejtë t’i gëzohemi këtij projekti.
Por pëlqime të këtilla ne marrim edhe prej kadastrës edhe prej EVN-së edhe ujësjellësit ato janë procedura që për çdo ndërtim i marrim dhe nuk ka ndonjë arsye që dikush ta merr përsipër dhe të lëvdohet me atë projekt”, tha Visar Ganiu – Kryetar i Komunës së Çairit.
Se a është bajraktarizëm, kabineti i Grubit po e sheh si tendencioze këtë temë.
Pak ka rëndësi sipas tyre se kush e promovoi, edhe pse në 3D e paraqiti në profilin e tij zëvendëskryeministri i parë, projektin për garazhet në kate.
“Tendenca të tilla të interpretimeve të lira janë të pasakta, zëvendëskryeministri i parë dhe Ministër për sistem politik dhe marrëdhënie ndërmjet bashkësive, z. Artan Grubi ka postuar vendimin e Qeverisë së Republikës së Maqedonisë së Veriut duke e përmendur në po të njëjtin post edhe kryetarin e komunës së Çairit, z. Visar Ganiu”, thonë nga Kabineti i zëvendëskryeministrit të parë, Artan Grubi.
Përveç promovimit online, ende nuk dihet se nga do të merren paratë për ndërtimin e këtij projekti.
Madje, sipas komunës së Çairit nuk dihet se ku do të merren paratë për këto garazhe në kat.
Sipas planit urbanistik është paraparë që garazhi të ketë katër kate.
Kryetari Visar Ganiu tha për TV21 se në qoftë se nuk do të ketë mjete, atëherë do të bëjnë bashkëpunime me ndonjë ndërmarrje për partneritet publiko-privat.