4 miliardë euro është buxheti i vitit 2021, por edhe ky vit do të jetë vit i sfidave dhe implikimeve që do të sjellë pandemia, tha Ministri i Financave Fatmir Besimi, në emisionin e mbrëmshëm Click Plus.
“Andaj edhe buxheti ka 3 prioritete dhe atë, në aspekt shëndetësor të mbrojë nga Kovidi, të ruajë ekonominë dhe vendet e punës, dhe pastaj tjetra është përshpejtimi i rritjes ekonomike, të ndihmojë ekonominë për investime, dhe e treta janë punë që kanë të bëjnë me funksionimin e shtetit, gjegjësisht reformat që kanë të bëjnë me gjyqësorin, obligimet që dalin ndaj NATO-s, si dhe procesin që ka të bëjë me BE-në”, tha Besimi.
9.4% e buxhetit do të shkojë për investime kapjtale, ndërsa 15% do të shkojë për rroga. Deputeti i opozitares Aleanca për Shqiptarët, Elmi Aziri, thotë se buxheti është tepër optimist dhe joreal!
“Ne deri më tani gjithmonë kemi biseduar për pritjet që ky buxhet do të realizojë rritje ekonomike 4,1% për vitin e ardhshëm ndërsa skenari pesimist është 2,4%. Vlerësimet e tona janë se ky buxhet është shumë optimist dhe i vendosur mbi baza joreale, për arsye se edhe në vitet kur nuk kemi pasur pandemi, kur nuk kemi pasur masa të ashpra kufizuese, asnjëherë parashikimet fillestare të qeverisë nuk kanë dalë sa i përket realizimit të buxhetit dhe normave të rritjes ekonomike”, deklaroi Aziri.
Kryetari i Odës ekonomike të Maqedonisë Veri-perëndimore, Nebi Hoxha, tha se kompanitë e vogla janë humbëset më të mëdha nga pandemia, andaj kërkoi që Qeveria të fokusohet tek to. Sa u përket investimeve kapitale, nëse ato nuk realizohen të paktën 80%, Hoxha paralajmëron stagnim ekonomik.
“Nga e kaluara e dimë që disa herë janë bërë ribalance të buxhetit dhe janë marrë mjetet nga investimet kapitale dhe janë hedhur në transfere të ndryshme sociale. Prandaj fokusi i vetëm dhe kryesor duhet të jetë në ekonomi dhe përkrahje e biznesit sepse ajo do të gjenerojë mjete dhe do të sjellë rritjen dhe impaktim më të madh në ekonominë e vendit”, tha Hoxha.
Pritshmëritë e Ministrit Besimi janë që realizimi i investimeve kapitale këtë vit të jenë mbi 70%. Deputeti Aziri nga ana tjetër u shpreh i bindur se ky buxhet nuk do ta presë as verën e 2021-shit dhe do të pësojë ribalanc. E Besimi pajtohet me këtë, duke thënë se gjatë vitit me shumë gjasa do të ketë rishikim të buxhetit, sepse edhe ky vit do të jetë me paparashikueshmëri të lartë.