“Bullgaria po përzihet në punët e brendshme të RMV-së”! Pendarovski dhe Zaev i hedhin poshtë akuzat e Sofjes zyrtare

Përzierje e ashpër në punët e brendshme të vendit. Kështu shefi i shtetit, Stevo Pendarovski e cilësoi hapin e Presidentit bullgar, Rumen Radev, i cili i ka thirrur shefat e shërbimeve speciale të Bullgarisë dhe u kërkuar të ndërmarrin masa, për, siç tha, rastet e shpeshta të agresionit ndaj bullgarëve në Maqedoni. Pendarovski, thotë se deri më tani nuk ka marrë asnjë informacion nga institucionet kompetente për shkelje të lirive dhe të drejtave të qytetarëve të Maqedonisë vetëm për shkak se e kanë shprehur përkatësinë e tyre etnike.

“Është e pazakonshme dhe jashtë procedurave të brendshme të Aleancës që President i një vendi-anëtar të NATO-s t’i mbledhë shërbimet e tij të sigurisë që të reagojnë për kinse shkeljen e të drejtave të qytetarëve në një vend-anëtar tjetër të NATO-s. Reagimi i Presidentit bullgar bie në kundërshtim me parimin themelor në politikën ndërkombëtare për mospërzierje në punët e brendshme të një vendi tjetër. Si vend kandidat për anëtarësim në BE, me vite të tëra jemi nën monitorimin e rregullt të Brukselit, por, as në Raportin e fundit vjetor të BE-së për përparim, nuk janë regjistruar raste të tilla”, tha Stevo Pendarovski – President i Maqedonisë së Veriut. 

Edhe kryeministri Zaev me qëndrim se pretendimet e Presidentit bullgar janë përzierje në punët e brendshme të vendit. Ai i hedh poshtë akuzat se ka raste për shkelje të të drejtave të njeriut. Në Maqedoni secili ka të drejtë ta shprehë përkatësinë e tij etnike, shton Zaevi.

“I dërgoj mesazh të fortë Bullgarisë fqinje, ku shoh se Presidenti Radev ka thirrur një takim, të jemi të kujdesshëm, sepse gjithmonë kemi ditur të japim përgjigje për shqetësimet e tyre, ashtu siç edhe ata kanë ditur t’u përgjigje shqetësimeve tona. Të mos biem nën insinuata ose informacione të pasakta, sepse gjithmonë mund t’i kontrollojmë. Është e palejueshme të ketë përzierje të një shteti të huaj në shtet të huaj. Ne këtë e kemi deklaruar edhe në Marrëveshjen për miqësi dhe fqinjësi të mirë me Bullgarinë”, potencoi Zoran Zaev – Kryeministër i Maqedonisë së Veriut.

Me kumtesë reagoi edhe opozitarja VMRO-DPMNE, prej ku thonë se Qeveria duhet ta dënojë sjelljen e kreut shtetëror bullgar për kërcënimet ndaj integritetit të vendit tonë.

“Qeveria sa më shpejt që është e mundur duhet ta dënojë sjelljen e Radevit, Zaharievës dhe politikanëve të tjerë bullgarë të cilët e kërcënojnë integritetin e vendit. Qeveria menjëherë duhet t’i informojë të gjithë përfaqësuesit ndërkombëtarë në Maqedoni, BE-në dhe NATO-n për sjelljen e Radevit, sepse në të kundërtin, Zaevi do të jetë fajtor për cenimin e sovranitetit të vendit dhe do të mbajë përgjegjësi në të ardhmen”, thonë nga VMRO-DPMNE. 

Presidenti i Bullgarisë Radev, në takimin që e ka thirrur me shefat e shërbimeve speciale bullgare, ka kërkuar të ndërmerren masa me kohë për mbrojtje adekuate të të drejtave të bullgarëve që jetojnë jashtë Bullgarisë, e të cilët, siç thuhet janë ekspozuar në sulme kundër vetëdijes së tyre kombëtare. Pas kësaj, me deklaratë doli edhe shefja e diplomacisë bullgare, Ekaterina Zaharieva, e cila tha se në Maqedoni ka pasur presion ndaj njerëzve që deklarohen si bullgarë. Reagimi i tillë vjen pas letrës së Shoqatës “Ivan Mihajllov” nga Manastiri, në të cilën shkruante se po shkelen të drejtat e tyre.