Arrijnë mesazhe të reja nga Bullgaria se Sofja nuk tërhiqet nga ajo që tashmë është dakorduar. Presidenti bullgar Rumen Radev në bisedë me Mirosllav Lajçak, përfaqësues special i BE-së për Ballkanin perëndimor, ka folur për eurointegrimin e rajonit, përfshirë edhe Maqedoninë.
“Presidenti Radev shpreson se së shpejti kryesia shtetërore e Maqedonisë së Veriut do të tregojë vullnet politik për plotësimin e konsensusit europian nga 2022, me çka do t’i hapet rruga shtetit drejt negociatave për anëtarësim të plotfuqishëm në BE”, thonë nga kabineti i Rumen Radevit.
Kryeministri Hristijan Mickoski dhe pjesë e ministrave ishin në vizitë të SHBA-ve ku, siç njoftuan, kanë lobuar për çështjet kyçe për ne dhe për eurointegrimet. Ish ambasadori në Francë, Nano Ruzhin mendon se presidenti Tramp do të zgjidhë çështje të tjera botërore.
“Unë jam pesimist për këtë çështje, për shkak se BE është e vendosur që ta realizojë atë që është nënshkruar, d.m.th të ndryshohet Kushtetuta nëse duam t’i vazhdojmë negociatat me BE”, tha Nano Ruzhin, ish ambasador.
Nga ana tjetër, ish kryetari i Këshillit të ambasadorëve, Muhamed Halili është optimist se negociatat për anëtarësim mund të fillojnë këtë vit.
“E ardhmja do të vijë, së pari nëse përmbushen të gjitha kriteret që i ka caktuar BE-ja për Maqedoninë, e dyta nëse Bullgaria në një farë mënyre pendohet dhe bën lëshime që të mos i përmbushim të gjitha kërkesat e saj sepse dihet, kriteri i Qeverisë është që “po” ndryshime kushtetuese, por me një afat të zgjeruar”, shtoi Muhamed Halili, këshill i ambasadorëve.
Përveç presidentit Radev, edhe kryeministri i sapozgjedhur Rosen Zhelazkov theksoi se do t’u përmbahen marrëveshjeve aktuale, edhe pse Shkupi pret të fillojë dialog me Sofjen, me çka do të mundësohen ndryshimet kushtetuese me prapaveprim ose garanci të tjera për rrugën tonë eurointegruese.