Pas mesazheve të disa përfaqësuesve të Brukselit se ideja për ndryshime kushtetuese me prapaveprim është e papranueshme, ministri për çështje europiane Orhan Murtezani tha se për ne është e pranueshme çdo zgjidhje që na garanton se nuk do të ketë pengesa të reja në rrugën tonë drejt BE-së. Murtezani theksoi se pushteti insiston në debilateralizim të procesit të mëtutjeshëm dhe se tani për tani pritet formimi i qeverisë së qëndrueshme politike në Bullgari.
“Edhe pse nuk duket se lehtë do të formohet qeveria e re, mendoj se nuk janë të konsumuara të gjitha mundësitë, sepse na u tha dhe e dimë se qeveria teknike në anën tjetër nuk do të pranojë, të them, dialog të mirë mes fqinjëve, e jo më të zgjidhen probleme më komplekse”, tha Orhan Murtezani.
Sipas një pjese të ekspertëve do të ishte shumë e vështirë që BE ta pranojë mundësinë për ndryshime kushtetuese me prapaveprim. Simonida Kacarska nga Instituti për politika europiane mendon se debatohet që të na jepen garanci të caktuara për të vazhduar procesi.
“Është e vështirë që ta shohim këtë, mendoj se çfarëdolloj garanci juridike në atë kontekst, me shumë gjasa flasim për diskutime politike të cilat ende nuk janë të materializuara…me shumë gjasa aktori i vetëm i cili është i qëndrueshëm për momentin atje është presidenti Radev i cili krijon çështje shtesë, megjithatë ekziston edhe ky debat në lidhje me atë se në prapavijë po punohet me Bullgari”, deklaroi Simonida Kacarska.
Sipas Kacarskës, fokusi për momentin do të jetë mbi progresin e Malit të Zi dhe Shqipërisë në rrugën drejt BE-së ndërsa Maqedonia nuk është ndër temat kryesore në Bruksel.