Brazili huton Serbinë, Richarlison dhe Vinicius “kërcejnë” samba në debutim

Ka përfunduar me rezultatin 2-0, sfida mes Brazilit dhe Serbisë, sfidë e cila i ka dhënë fundin raundit të parë, të ndeshjeve të fazës së grupeve, të “Katar 2022”.

Brazili e nisi me vrull, por pa ide konkrete duke e lënë të qetë portën e Milinkoviç-Saviç, në pjesën e parë, e kundërta ndodhi me Serbinë e cila pati 2 raste shënimi por pa mundur ti “përkthente” mundësitë në gol.

Me startin e pjesës së dytë, Brazili u shfaq gjithnjë e më kërkues me Vinicus, Raphinha dhe Neymar, të cilët provuan por pa patur fat në gjetjen e golit.
Richarlison, njeriu nga i cili pritej më pak, bëri më shumë por në total, Selecao shkëlqeu në ndeshjen e fundit të raundit të parë të fazës së grupeve. Është e vërtetë që fitoi vetëm 2-0 por loja që tregoi ndaj Serbisë është për t’u mbajtur shënim.
Sulmuesi i Tottenham realizoi një supergol për të vendosur në kasafortë suksesin e skuadrës së trajnerit Tite, një nga favoritet e këtij botërori. Sukses që forcon pozitat e skuadrës së artë në kërkim të trofeut të gjashtë të Kupës së Botës, 20 vite pasi e bënë një gjë të tillë në Kore dhe Japoni.