“Boll më” para Qeverisë, policia i largon! Kërkojnë ulje të çmimit të energjisë elektrike, rrugë tjetër nuk ka!

Erdhën para Qeverisë. Me vete kishin edhe disa transparente që tregonin revoltën e tyre ndaj faturave të larta të energjisë elektrike. Këto janë protestuesit nga Iniciativa BOLL MË.

Por kur u pozicionuan para Qeverisë një polic u tha të largohen nga atje.

“Po dilni jashtë gardhit t’i njoftojmë sepse duhet t’i njoftojmë”.

Pasi dolën jashtë gardhit të Qeverisë, Krenar Osmani nga iniciativa BOLL MË tha se qysh në korrik të vitit 2020 kryeministri Zaev ka paralajmëruar se do të ulë TVSH-në nga 18 në 5 përqind.

“Iniciativa qytetare “BOLL MË” në pikën e dytë të parashtruar që në korrik të vitit 2020 pik të dytë e ka uljen e TVSH-së nga 18 në 5 për qind. Nëse ky shtet synon që të anëtarësohet në BE, ky sugjerim dhe kjo direktivë duhet të zbatohet patjetër, rrugë tjetër nuk ka. Çdo shtet i BE-së TVSH-së për energji e ka prej 5 deri në 9 për qind, varësisht nga forca dhe zhvillimi ekonomik që e ka. Nëse duam të anëtarësohemi në BE duhet t’i përmbaheni rregullave dhe direktivave që na i cakton BE-ja”, deklaroi Osmani.

Ndërsa me 8 janar kryetari i komisionit rregullator Energjetik Marko Bislimoski në një intervistë për MIA tha që për momentin nuk pritet rritje të çmimit të energjisë elektrike, përkundër prodhimit të zvogëluar të hidro-kapaciteteve të vendit, kryesisht për shkak të hidrologjisë së dobët që në fund të vitit 2020 detyroi nevojën për importe.

“EEM-ja ka detyrime t`i sigurojë nevojat e konsumatorëve të vegjël dhe amvisërive me një çmim që vetë e përcakton, për shkak se KRRE-ja nuk e përcakton çmimin e energjisë elektrike të EEM-së. Nëse do të ketë importe shtesë apo jo, nuk ka rëndësi në aspekt të çmimit, sepse në kalkulimet e KRRE-së hynë çmimi i ofruar nga EEM-ja dhe në kuadër të këtij çmimi EEM-ja do të mbulojë harxhimet e saj për importimin e energjisë elektrike, thotë Bislimoski”, thonë nga EEM-ja.

Aktivistët thonë se nuk do të heqin dorë nga kërkesat e tyre. Ndërsa pasi përfunduan protestën polici i cili i largoi nga shkallët e Qeverisë u tha që të marrin me vete edhe transparentët dhe mos t’i lënë aty, po sa shkuan polici i largoi.