Presidenti amerikan Joe Biden ka mbërritur në Kiev këtë të hënë, në një vizitë surprizë dhe të parën në Ukrainë që nga nisja e pushtimit rus rreth 1 vit më parë.
Vizita e papritur erdhi teksa ai udhëtoi për në Poloninë fqinje për të takuar Presidentin Andrzej Duda.
Kishte spekulime dhe më herët se një mysafir i rëndësishëm po mbërrinte në kryeqytetin ukrainas, por asgjë nuk ishte ende e konfirmuar.
Ka qenë politikania ukrainase Lesia Vasylenko ajo e cila ka konfirmuar zyrtarisht se presidenti Biden ka mbërritur në Kiev.
“Po, e konfirmuar, presidenti Biden është në Kiev . Mirë se vini zoti President! Në pritje të njoftimeve pas përvojës së sirenave të sulmit ajror”, shkruan ajo në Twitter.