“Bërdo-Brioni” mblodhi presidentët e Ballkanit/ U fol për stabilitetin rajonal, migrimin dhe ndryshimet klimatike

Në kuadër të procesit Bërdo Brioni, në Shkup u mbajt takimi i radhës mes liderëve të Ballkanit. Nikoqir i këtij takimi ishte presidenti i vendit, Stevo Pendarovski së bashku me presidentin e Kroacisë Zoran Millanoviq si dhe presidenten sllovene, Natasha Pirc Musar. Në këtë takim morën pjesë gjithashtu edhe presidentët e shteteve tjera të rajonit sikurse ajo e Republikës së Kosovës, Vjosa Osmani, i Republikës së Shqipërisë Bajram Begaj, i Serbisë, Aleksandar Vuçiq, i Malit të Zi, Jakov Millatoviq si dhe anëtarë të presidencës boshnjake. Fokusi i takimit të përbashkët plenar ishte te integrimet europiane, ndryshimet klimatike dhe migrimi i të rinjve. Në këtë kontekst, liderët diskutuan për zhvillimin e eurointegrimeve si parakusht për stabilitet dhe prosperitet në rajon, për përforcimin dhe zhvillimin ekonomik me qëllim parandalimin e ikjes së të rinjve, si dhe mundësitë për zbutjen e pasojave nga ndryshimet klimatike si sfidë globale.

“Lidhur me vendin tonë, aspiratave tona, rrugës tone deri tani është e qartë se ekziston një disbalans mes kritereve tradicionale të them për hyrje në Bashkimin Evropian dhe marrëdhëniet dypalëshe me së paku dy vende fqinje. Në tre vitet e fundit veçanërisht ne kemi debalans serioz në këtë drejtim sepse problem bilateral me Bullgarinë për fat të keq e mbuloi atë agjendë tradicionale europiane për inkuadrim.”- deklaroi Stevo Pendarovski, president i RMV-së.

“Kroacia dhe Sllovenia mund të ndihmojnë edhe më tepër nga ajo që mund të mendojmë për këtë pjesë të Europës që të integrohet në Bashkimin Europian dhe kjo filozofi dhe politikë e zvarritjes nuk zgjatë aq sa zgjatë e për këtë mjetet dhe fuqitë që kemi në dispozicion gjithsesi janë të kufizuara.”- tha

Zoran Millanoviq, President i Kroacisë.

Pjesë e dialogut ishte gjithashtu edhe rregullimi i marrëdhënieve mes Prishtinës dhe Beogradit, meqenëse ky është takimi i fundit në prag të procesit të Berlinit i cili është caktuar për më 14 shtator e ku pritet edhe takim mes Vuçiqit dhe Kurtit. Por sa ka kontribuar deri tani ky proces, pra Bërdo-Brioni për përmirësimin e marrëdhënieve mes Prishtinës e Beogradit, presidentja e Kosovës Vjosa Osmani thotë kur nuk ka vullnet nga vet shtetet, ne këtë rast ajo aludon për Serbinë, nuk mund te ndihmoje asnjë takim.

“Po tash është vështirë që cilido proces të ndihmojë për afrimin mes dy shteteve në qoftë se nuk ekziston vullneti nga vet shtetet. Në këtë rast vullneti nga ana e Republikës së Kosovës gjithnjë është i fuqishëm që të kemi raporte normale, raporte të përafruara, raporte ku e njohim njëra tjetrën, sovranitetin e njëra tjetrës, integritetin territorial ku nuk luftohet tjetri. Atë ne e kemi si vullnet të gjithmonshëm por fatkeqësisht nuk mund ta them të njëjtën për Serbinë.”- deklaroi Vjosa Osmani-Sadriu, Presidente e Kosovës.

Përndryshe iniciativa Bërdo Brioni ishte formuar në vitin 2010, nga presidentët e atëhershëm të Kroacisë dhe Sllovenisë ndërsa qëllimi është që vendet e rajonit t’i zgjidhin mosmarrëveshjet në mënyrë paqësore por edhe të ndihmojnë njëra tjetrën në rrugën euroatlantike.