Me uljen e numrit të të infektuarve, po lehtësohen edhe masat restriktive.
Sipas ministrit të Ekonomisë Kreshnik Bekteshi i cili mbrëmë ishte në emisionin Click Plus e përsëriti se në fund të muajit pritet të hapen restorantet që organizojnë dasma.
Ai gjithashtu theksoi se edhe nëse do të hapen restorantet do të ketë protokolle që do të përgatiten nga ekspertë.
“Edhe restorantet e dasmave apo restorantet që organizojnë ahengje të ndryshme diku në fund të këtij muaji apo në fillim të muajit të ardhshëm të mund të fillojnë me punë. Me siguri në bazë të protokolleve do t’i përgatisin ekspertët e fushës dhe varësisht nga situata epidemiologjike e cila vërehet që në Maqedoninë e Veriut është duke rënë numri i të infektuarve”, tha Kreshnik Bekteshi, ministër i Ekonomisë ”.
Remzi Memedi tha se Qeveria ka dështuar në menaxhimin e pandemisë dhe se ndihma e shtetit për gastronomët nuk kanë pasur efekt.
“Masat për ndalesë qarkullimi ose për funksionimin normal të gastronomive, herë janë të mbyllur herë janë të lëshuar por nuk e shoh të kenë dhënë efekt në kuptimin e drejtpërdrejtë për parandalimin e pandemisë, sepse numrat e demantojnë të njëjtën por njëkohësisht kanë rënduar me tepër situatën socio-ekonomike”, tha Remzi Memedi, nënkryetar i Aleancës për Shqiptarët.”
Ministri Bekteshi i pyetur se sa ka humbur ekonomia këtë muaj, kur restorantet ishin të mbyllura e shumë qytetarë të vendit shkonin në Kosovë për të darkuar, tha se nuk kanë bërë ndonjë llogaritje të tillë.
Sipas tij qytetarët kanë shfrytëzuar lëshimin që ka bërë Qeveria dhe komisioni, kur edhe pse kishte orë policore në vend, mund të vinin nga Kosova qytetarët që kishin shkuar për shëtitje.