Fëmijë të veshur kuq e zi dhe me flamuj në dorë.
Kështu u prit presidenti i Shqipërisë Bajram Begaj në komunën e Çairit.
Përveç kryetarit të komunës Izet Mexhiti, për ta pritur dolën edhe zëvendëskryeministri Arben Fetai dhe zv/ministrja e transportit Kaltrina Zekolli-Shaqiri.
Pas takimit në komunë, Begaj vizitoi xhaminë e Mustafa Pashës, ku u mirëprit prej myftiut së Shkupit Qenan Ismaili. Këtu mori edhe dhuratë.
E më pas vazhdoi në Çarshi.
Vendosi lule te përmendorja e Gjergj Kastriotit – Skënderbeut.
Në agjendën e sotme të Begajt nuk ishin të parapara deklarata për mediat.
Për vizitën foli nikoqiri i sotëm Mexhiti.
“Vizitën e radhës presidenti i Shqipërisë Bajram Begaj e filloi pikërisht nga komuna e Çairit duke na nderuar dhe duke përfunduar në Çarshinë e Vjetër, në Sheshin Skënderbeu tek monumenti i Skënderbeut dhe për të vazhduar takimet e radhës, pra uroj që të jetë vizitë e suksesshme, vizitë e cila i thellon bashkëpunimet ndërmjet dy vendeve tona”, tha Izet Mexhiti – kryetar i Komunës së Çairit.
Pas kësaj, Presidentit i Shqipërisë vazhdoi agjendën e paraparë. Qëndroi në Komunën e Çashkës, ku u prit kryetari Suat Shaqiri, ndërsa më pas do të vizitojë edhe Jabollçishtën e Epërme.
Nesër, Begaj do të zhvillojë takim me kryetarin e Kuvendit, Afrim Gashi, do t’u drejtohet deputetëve me fjalim në Kuvend, si dhe do të pritet nga presidentja Gordana Siljanovska-Davkova. Sipas paralajmërimeve, më 28 shkurt ai do të qëndrojë edhe në Tetovë, ku do të pritet nga kryetari i komunës, Bilall Kasami.