BE kërkon hapa të guximshëm dhe strategjikë – Petkov: Unioni qëndroi në anën e Bullgarisë

Ish-kryeministrat e Bullgarisë, Bojko Borisov dhe Kiril Petkov e thirrën Shkupin që t’i vendosë bullgarët në Kushtetutë që Maqedonia të mos mbetet e bllokuar në rrugën drejt BE-së. Ata thonë se BE ka qëndruar në anën e Bullgarisë ndërsa Maqedonia duhet ta respektojë atë që është dakorduar.

“Rezultati është se Shqipëria vazhdon përpara. Ajo e pranoi komunitetin bullgar ndërsa kolegët e Maqedonisë së Veriut le të përballen me pasojat e sjelljes së tyre”, tha Bojko Borisov.

“Republika e Maqedonisë së Veriut duhet të vendosë nëse do që t’i vendosë bullgarët në Kushtetutën e tyre ose rruga e tyre drejt BE-së do të bllokohet. Unë shpresoj se do të mendojnë për shkak se kjo që po ndodh për momentin është se Shqipëria ndahet prej tyre dhe do ta vazhdojnë rrugën e saj drejt BE-së më shpejt”, tha Kiril Petkov.

Nga ana tjetër, në intervistë për MIA, presidentja Gordana Siljanovska-Davkova theksoi se në Marrëveshjen për fqinjësi të mirë me Bullgari askund nuk shkruan se duhet të vendosen bullgarët në Kushtetutë. Ajo nuk u përgjigj konkretisht nëse ka mundësi që të realizohet ideja e qeverisë për të ashtuquajturin “Propozimi francez plus” përkatësisht të merren garanci të reja për të cilat duhet të ketë dialog me Bullgarinë.

Presidentja dje në Nju Jork mori pjesë në drekë pune për krerët e Ballkanit Perëndimor në organizim të përfaqësuesit të lartë të BE-së për politikë të jashtme, Zhozep Borel. Ai theksoi se anëtarësimi në BE është shumë afër por se nevojiten hapa të guximshëm.

“Takimi ishte mundësi që përsëri të dërgohet thirrje për zgjidhjen e kontesteve dypalëshe. Përfaqësuesi i lartë Borell e theksoi rëndësinë e marrëdhënieve të mira fqinjësore përmes dialogut dhe kompromisit si hapa kyç drejt integrimit në BE. Liderët duhet të marrin vendime strategjike dhe të guximshme për përparimin e aspirimeve europiane”, tha Komisioni Europian.

Autoritetet e Maqedonisë theksuan se do të presin që të formohet qeveri e qëndrueshme politike në Sofje me të cilën eventualisht do të hapnin dialog për zhbllokimin e procesit eurointegrues. Zgjedhjet në Bullgari janë caktuar për më 27 tetor.