BDI: Ministrit Mexhiti i janë marrë kompetencat! LD-ja dhe Ministria pa sqarim, Ministria e Administratës demanton

Që mbrëmë, por edhe sot herët në mëngjes, Lëvizja Demokratike paralajmëroi konferencë për media ku sipas njoftimit, pritej që deklaratë të jepte kreu i partisë, njëherë dhe ministri i Mjedisit Jetësor dhe Planifikimit Hapësinor, Izet Mexhiti. 

Një orë pas këtij njoftimi, opozitarja BDI doli me një komunikatë ku shkruanin se Inspektorati për Administratë ka vërtetuar “keqpërdorim të detyrës zyrtare” nga ana e ministrit të Mjedisit Mexhiti dhe stafit të tij, dhe se siç shkruajnë integristët, Mexhitit i janë marrë kompetencat duke u transferuar në Drejtorinë e Mjedisit dhe duke e vënë institucionin nën kontrollin e një drejtori të emëruar nga VMRO-DPMNE.

“Me këtë vendim, Drejtori i ri është urdhëruar që të mos dërgojë për nënshkrim në kabinetin e Mexhitit asnjë dokument nga sektorët kryesorë të ministrisë, përfshirë Sektorin e Natyrës, Ujërave, Mbeturinave, Mjedisit dhe Ndotjes Industriale. Këta sektorë përbëjnë mbi 70% të kompetencave të Ministrisë së Mjedisit, duke e bërë këtë akt një zhvillim të paprecedentë”, thonë nga BDI.

Pas kësaj, në konferencën për shtyp të paralajmëruar nga LD, në vend të Mexhitit u paraqit Bashkim Hasani, i cili na la pa përgjigje për akuzat e BDI-së.

“Kompania e Kosovës sot na mundëson na mundëson një trajnim të mrekullueshëm, dhe kështu që na ka lodhur edhe fizikisht edhe psiqikisht dhe jemi të koncentruar vetëm për punën e trajnimit. Ndërsa për punët politike besoj që ditët në vijim do të ketë edhe deklarata”, shtoi Bashkim Hasani, përfaqësues i Lëvizjes Demokratike.

Për komunikatën e integristëve pasoi reagimi i Ministrisë së Mjedisit. Në gjithë kundërpërgjigjen, askund nuk ka një demant ose sqarim për ato që pohon BDI-ja, por reagimi është politik, duke shkruar se BDI-ja  nuk po mund të pajtohet me faktin se populli shqiptar ia morri ingerencat për të udhëhequr me të, pas 22 vjet dështimesh të njëpasnjëshme, keqmenaxhimit dhe korrupcionit masiv.

“Bashkimi Demokratik për Integrim për 22 vjet nuk ka kuptuar se organet qeveritare siç janë ministritë, nuk udhëhiqen nga letrat e arkivuara, por nga ligjet dhe Kushtetuta. Këtë nuk e kanë mësuar për 22 vjet në pushtet, por tani në opozitë e kanë mundësinë për të mësuar se si udhëhiqet shteti. Ne do të vazhdojmë mandatin me sanimin e politikave të gabuara 22 vjeçare të BDI-së, që kanë lënë shenja plage në të gjitha institucionet në nivel lokal dhe qendror”, deklaroi Ministria e Mjedisit Jetësor dhe Planifikimit Hapësinor.

Po përgënjeshtrimin e bëri Ministria e Administratës, të cilët thanë se BDI po përhap gënjeshtra dhe dezinformon publikun, sepse Inspektorati për Administratë nuk mund t’ua marrë kompetencat ministrave e të kryejë hetime për korrupsion.

“Ajo që ka ndodhur realisht ka qenë një inspektim i rregullt në Drejtorinë e Mjedisit, i kryer në përputhje me Planin Vjetor të Punës për vitin 2024. Kjo mbikëqyrje ka të bëjë ekskluzivisht me respektimin e procedurave ligjore dhe nuk ka asnjë lidhje me akuzat e bëra nga BDI”, shtojnë Ministria e Administratës.

Në fund, Ministria e Administratës Publike siguron se nëpërmjet Inspektoratit për Administratë, nuk do të lejojë që strukturat politike të abuzojnë me sistemin për qëllimet e tyre politike.