Në momente kur minierat Illovica dhe Shtuka duhej të bashkohen dhe të fillojnë me punë, qytetarët njëzëri kundërshtuan këtë çështje përmes protestave. Kundër fillimit me punë, ishin edhe ministreshat Trençevska dhe Shukova, të cilat iu bashkuan protestës. Ndërkohë Ministri i ekonomisë Kreshnik Bekteshi është obliguar nga Qeveria që në seancën e radhës deri ditën e martë, të sjellë informacione të detajuara për të gjitha vendimet gjyqësore dhe të gjitha procedurat që ka kaluar dhënia e koncesionit për minierat Illovica dhe Shtuka në qytetin e Strumicës.
“Për të gjitha vendimet gjyqësore apo procedura administrative të cilat janë në shqyrtim e sipër që nga viti 2012 e deri më sot dhe në bazë të këtyre informacioneve, të sillen vendime të nevojshme për të ardhmen. Por duhet të kemi kujdes për interesin e qytetarëve. Unë këtë e kam thënë edhe si kryetar i Qeverisë edhe i partisë prej të cilës vij, se miniera mund të ketë vetëm me pajtim të qytetarëve të cilët jetojnë në një rajon të caktuar, nëse ata janë kundër, minierë nuk mund të ketë!”- deklaroi Dimitar Kovaçevski, Kryeministër.
Ministrat Spasovski dhe Shukova, që vijnë nga radhët e LSDM-së, për bashkimin e dy minierave paraprakisht kanë deklaruar se nuk kanë pasur njohuri thelbësore për lëndën dhe se janë mbështetur në atë prezantuar Bekteshi. Por çfarë do të ndërmer kabineti Qeveritar nëse konstatohet se Bekteshi ka fshehur informacione?
“Unë pres t’i përmbushë obligimet të cilat kanë dalë nga konkluzionet e Qeverisë. Në përputhje me aspektin tjetër, pasi t’i shohim dhe shqyrtojmë të gjitha aspektet për këtë çështje, do të vendosim se si do të veprojmë më tej në pjesën e asaj që na takon si kabinet.”- tha Sllavica Gërkovska, Zv.Kryeministre ër Politika për Qeverisje të mirë.
Nga ana tjetër kreu i VMRO-DPMNE-së Hristijan Mickoski, habitet pse deri tani askush nga Qeveria nuk ka kërkuar të tërhiqet ajo marrëveshje meqenëse janë mashtruar.
“Ajo që është më tepër dyfytyrësi dhe me standarde të dyfishta është fakti që kishte seancë të Qeverisë, a dëgjuat dikë prej atyre që u gënjyen se është votuar në seancë që të shlyhet marrëveshja që të mos gënjehen? Unë nuk dëgjova. Kishte disa anëtarë të Qeverisë të cilët thanë se janë mashtruar nga ana e ministrit Bekteshi. Nëse unë ndjehem i gënjyer, logjike është të dal në seancë dhe të tregoj se kush më mashtroi, dhe nuk dua ta mbështes, dhe kjo pikë të kthehet mbrapa dhe ta shfuqizoj koncesionin.”- deklaroi Hristijan Mickoski, kryetar i VMRO-DPMNE-së.
Përndryshe lidhur me minierat, nga DPMNE dje zbuluan detaje të reja. Sipas tyre, kompania e cila duhet të menaxhojë me to, është kompani e familjes Destani nga Tetova, e të cilën ata e llogaritin si të afërt me BDI-në.