A do të ulen provizionet bankare, pas kërkesës që guvernatori Trajko Sllaveski ua adresoi bankave?! Bankierët thonë se ky është një vendim individual i çdo banke. Po shqyrtojnë çmimoret dhe po kalkulojnë nëse dhe sa mund të ulen. Por rikujtojnë edhe premtimin e Guvernatorit që Banka Popullore do të ulë tarifat që bankat paguajnë për përdorimin e shërbimeve në Sistemin Ndërbankar të Pagesave në Maqedoni (MIPS).
“Bankat tashmë kanë filluar të shqyrtojnë tarifat e tyre, në përputhje me atë që kërkoi guvernatori, por siç theksova edhe atëherë, kjo është një vendim individual i çdo banke, respektivisht i organeve drejtuese të bankës. Së pari duhet të shqyrtojmë tarifat; ishte premtuar edhe nga Banka Popullore që në trafikun debitues, për transaksionet që lidhen me MIPS, do të ketë lehtësim nga ajo tarifë. Këto janë llogaritje më komplekse, si për njëra, ashtu edhe për tjetrën palë, prandaj në kohën e duhur do të reagojnë, pres që do të reagojnë”, tha Maja Stevkova Shterieva – kryetare e ABM.
Guvernatori i Bankës Popullore, Trajko Sllaveski, javën e kaluar u kërkoi bankave të ulin provizionet për shërbimet e pagesave që ua ngarkojnë qytetarëve dhe kompanive. Nëse nuk bien dakord, ai kërcënoi me miratimin e një ligji me të cilin Banka Popullore do të rregullojë komisionet.
“Nëse çmimet e energjisë elektrike, gazit natyror, furnizimit me ujë dhe shërbimeve të telekomunikacionit janë të rregulluara, atëherë nga vjeshta mund të rregullohen edhe çmimet e shërbimeve të pagesave”, u shpreh Trajko Slaveski – Guvernator i Bankës Popullore.
Sipas Sllaveskit, duhet të ulen ose të hiqen tërësisht, ashtu si në BE, komisionet për mirëmbajtjen e llogarisë së pagesave, bankat elektronike dhe mobile, pagesat ndërbankare në denarë, tërheqjen e parave nga bankomatë të huaj dhe pagesën përmes terminaleve. Ai tha se Banka Popullore do ta bëjë hapin e parë duke ulur provizionet që u ngarkon bankave komerciale.
Të dhënat e Bankës Popullore tregojnë se vetëm për tre muajt e parë të këtij viti, bankat realizuan fitim prej gati 73 milionë eurosh. Vetëm nga provizionet u mblodhën 44 milionë euro nga qytetarët dhe sektori i biznesit. Viti 2024 u mbyll me fitim prej 283 milionë eurosh dhe me të ardhura nga provizionet prej 115 milionë eurosh.