Aziri i kërkon Spasovskit të dalë nga primitivizmi! Opozita shqiptare këmbëngul në propozim-ligjin e saj për shtetësinë

Ministria e Brendshme dhe Oliver Spasovski, po udhëheqin një fushatë të trashëguar nga sistemi i kaluar kundër të drejtave të njeriut, ndaj propozim-ligjit për shtetësi të opozitës shqiptare, akuzon deputeti i Aleancës për Shqiptarët Elmi Aziri.

“Ne u japim mundësi qytetarëve për t’u ndjerë të pranuar dhe të integruar në sistemin shëndetësor dhe tregun e punës, një udhë e dy punë, ti personalisht të dalësh nga primitivizmi yt”, deklaroi Aziri.

Aziri vazhdon akuzat duke thënë se nga ky ligj po çirren maska e rrejshme e socialdemokratëve “një shoqëri për të gjithë”.

“Slogani shoqëri e përbashkët për të gjithë e keni pasur vetëm farsë për të shfrytëzuar vetëm për votë, ndërsa në esencë ngeleni nacionalistë”, tha Aziri.

Ditë më parë, i pari i Ministrisë së Brendshme, tha se ligji për shtetësinë i propozuar në Kuvend nga koalicioni Aleanca për Shqiptarët dhe Alternativa, është i pakuptueshëm se çfarë dëshiron të arrijë.

“Sjella e zgjidhjeve të këtilla, si të them, para së gjithash janë pamflete politike. Nga vetë teksti i ligjit që do ta shihni, nuk do të kuptoni se çfarë duan ata që e kanë propozuar. Mendoj se nuk kemi zgjidhje të përhershme. Ne na duhet zgjidhje e përhershme, mbrojtje e interesave shtetërore e nacionale dhe mbrojtje e qytetarëve që janë këtu dhe duhet ta marrin shtetësinë”, deklaroi Spasovski.

Për propozim-ligjin e opozitës shqiptare Spasovski deri në Qeveri ka dërguar mendim me kritika, ndërsa paralajmëroi se janë duke punuar për variante të mundshme për një ligj të ri për shtetësinë. Kjo duket se e ka futur mes dy zjarreve partinë shqiptare në pushtet, BDI-në.

“BDI do e mbështesë, nuk e mbështet, do e mbështesë ligjin e propozuar nga opozita shqiptare në Kuvend, por gjithsesi se do e mbështesë edhe ligjin në Qeveri sepse ligj në Qeveri, pa qenë i harmonizuar mes partnerëve të koalicionit nuk mund të kalojë, duhet të harmonizohet mes partnerëve të koalicionit më pas ta merr mbështetjen, dhe në qoftë se kalon, ta dini se e ka mbështetur BDI-ja”, tha Grubi.

Aziri kërkon nga BDI të mos manipulojnë, herë duke e mbështetur ligjin si parti parti politike, e nga ana tjetër si pjesë e Qeverisë duke thënë “do të shohim se ç’do bëjmë”. Propozim-ligji i opozitës shqiptare vazhdon të jetë në procedura kuvendore, ndërsa Aziri konfirmon se për momentin nuk ka ndonjë komunikim të ri me grupet parlamentare.