Ambasadorët e Austrisë, Suedisë dhe Finlandës i theksuan përfitimet e vendeve të tyre nga anëtarësimi 30 vjeçar në BE dhe e thirrën Maqedoninë t’i zbatojë reformat dhe të anëtarësohet. Ata u pyetën edhe për sfidën politike me bllokadën për fillimin e negociatave.
“Keni rrugë të ndarë politike, ndërsa kjo pyetje është për qeverinë këtu. Ky vendim është në duart e Maqedonisë së Veriut”, tha Ami Larson Jain.
Ambasadori i Austrisë Martin Pamer thotë se Maqedonia e ka përkrahjen e të gjitha vendeve për anëtarësim, nga disa më shumë nga disa të tjera më pak, por se duhet të vazhdojë me reformat.
“Besoj se sfidat aktuale, atë që e përmendët, për zbatimin e të ashtuquajturit kompromis europian nga 2022 mund të tejkalohet me vullnet të mirë nga të gjitha palët e përfshira”, deklaroi Martin Pamer.
Derisa nuk tejkalohet bllokada politike, ambasadori i Finlandës Niklas Lindkvist tha se Shkupi duhet t’i përdorë përparësitë nga Agjenda reformuese dhe Planin për rritje.
“Dialogu mes vendeve është shumë i rëndësishëm që të bisedohet për këto gjëra dhe të zhvillohet një debat i hapur. Kur bëhet fjalë për anëtarësimin në BE dhe negociatat për integrim në BE, këto janë negociata që i zhvillon çdo vend me institucionet e BE-së e jo me fqinjët e tij”, u shpreh Niklas Lindkvist.
Nga ana tjetër, kryeparlamentari Afrim Gashi theksoi se për shkak të luftës në Ukrainë dhe zgjedhjeve presidenciale në SHBA, ka një moment të ri politik dhe vullnet që Maqedonia ta përshpejtojë procesin eurointegrues. Gashi tha se përmes diplomacisë parlamentare, partnerëve të vendit ua shpjegon pengesën me ndryshimet kushtetuese dhe shpreson se, siç thotë, më në fund do të arrijmë ta tejkalojmë këtë pengesë.