Konfrontimi mes turmës dhe policisë në protestën e djeshme kundër rasteve të montuara gjyqësore ishte skenar i përgatitur i Qeverisë me qëllim provokimin e masës, akuzon koalicioni opozitar Aleanca për Shqiptarët-Alternativa, e cila kërkon dorëheqjen e ministrit të Brendshëm dhe zëvendësit të tij, për shkeljen e ligjit për tubime publike.
“Shkupi dje i ngjante një zone të luftës nga numri i madh i policëve përballë protestave paqësore, duke shtypur dhe ndaluar ata në mënyrë të kundërligjshme. Policia ishte ajo që gjuante gurin dhe fshihte dorën me qëllim që të provokojë masën e kjo shihet edhe në filmimet e mediave, e kjo flet për skenarin e përgatitur të policisë së regjimit Zaev-Ahmeti”, deklaroi Bujare Abazi nga koalicioni ASH-AAA.
Nga opozitarja VMRO-DPMNE dënojnë çdo lloj dhune, ndërsa për çdo pasojë gishtin e drejtojnë nga Kryeministri Zoran Zaev, duke e quajtur nxitës të tensioneve ndëretnike.
“Kryeministri nga LSDM, Zoran Zaev ka luajtur me ndjenjat e qytetarëve. I gënjeu edhe shqiptarët, edhe maqedonasit. I gënjeu familjet të atyre që humbën tragjikisht në atë ngjarje, ndërsa i ka gënjyer edhe qytetarët dhe familjarët e të akuzuarve dhe të gjykuarve”, potencoi Dimçe Arsovski nga VMRO-DPMNE.
Nga partia e kryeministrit, LSDM-ja, po ashtu dënojnë çdo akt dhune, ndërsa po presin nga organet që të zbardhin se çfarë ndodhi dje konkretisht.
“Dënojmë çdo lloj të dhunës, nga kushdo që vjen dhe ndaj çdokujt që i drejtohet. Presim që institucionet kompetente ta shqyrtojnë rastin dhe ta zbardhin që të dihet se çfarë saktësisht ndodhi dje në protesta”, tha Bogdanka Kuzeska nga LSDM.
Nga Bashkimi Demokratik për Integrim thonë se e drejta e protestës është e drejtë kushtetuese që nuk mund t’i mohohet asnjë qytetari të shprehë pakënaqësinë në forma të ndryshme.
“Mjafton dhe duhet detyrimisht ato të jenë paqësore dhe kujtoj që kështu duhet të vazhdojnë edhe më tutje, pa u mohuar e drejta e qytetarëve për t’u mbledhur, për të treguar protestën e tyre por duhet të respektohet rendi i brendshëm i vendit, natyrisht duhet të respektohet edhe nga organet, procedura për kontrollin dhe mbarëvajtjen e protestës”, theksoi Bujar Osmani nga BDI.
Protesta e djeshme eksaloi kur policia i ndaloi protestuesit të shkojnë drejt gjykatës dhe qeverisë. U protestua në shenjë revolte për siç thonë rastet e montuara gjyqësore.