ASH-AAA me 7 mijë amendamente të reja! Deputetët gjithë ditën nënshkruajnë për të bllokuar Kuvendin

Nënshkruajnë amendamente, të cilat duket se nuk kanë fund. Të tjera vazhdojnë të vijnë.

Deputetët e opozitës shqiptare, Skender Rexhepi dhe Elmi Aziri, pa ndërprerë hedhin nënshkrimet mbi amendamentet që do t’i propozojnë me qëllimin për të bllokuar punën e Kuvendit.

“Talati nuk do të mund të na sjellë…e ka për obligim letër dhe toner vetëm të na sigurojë, se tjerat lehtë bëhen…”.

Kështu vijon kundërpërgjigjja ndaj pushtetit dhe opozitës maqedonase që kanë kundërshtuar projektligjin për shtetësinë.

Vetëm sot gjithë deputetët e koalicioni Aleanca-Alternativa kanë përgatitur 7 mijë amendamente mbi propozim ligjet e radhës për financa dhe buxhet. Gjithsej deri më tani kanë dorëzuar mbi 10 mijë.

“Ne jemi më shumë se të vendosur në këtë çështje. Jo 7 mijë, po nëse ka nevojë edhe 17 mijë amendamente do t’i përdorim sepse është e papranueshme të pengohet diskutimi për një çështje që është jetike për jetën e qytetarëve”, deklaroi Elmi Aziri – deputet i ASH-AAA.

Zëvendëskryeministri i parë, Artan Grubi, nga Kuvendi tha sot se qasja destruktive nuk ndihmon me vota para qytetarëve, përkundrazi, shtoi ai, kur janë konstruktiv apo ide të dobishme, ato inkorporohen në propozim ligje më pastaj miratohen në procedurë parlamentare.

 “Apeli im është që të jenë konstruktiv, të japin ide kreative dhe të marrin përsipër përgjegjësinë të cilën e kanë kërkuar nga qytetarët për të punuar për qytetarët dhe jo për të bllokuar zgjidhjet për qytetarët”, u shpreh Artan Grubi – zëvendëskryeministër i parë.

Kryeministri Zoran Zaev ditë më parë u tregua i gatshëm të thërrasë edhe takim liderësh për të gjetur zgjidhje. Kryetari i BDI-së, Ali Ahmeti dje u shpreh i hapur për dialog dhe kompromis për debllokim të Kuvendit. Edhe opozita shqiptare është e gatshme për debat, por deputeti Aziri thotë se tani nuk kanë marrë asnjë ofertë.

 “Çdo ofertë për debllokim të parlamentit ne do t’i përgjigjemi me dashamirësi si çdoherë. I japim gjithnjë përparësi debatit”, shtoi deputeti i ASH-AAA, Elmi Aziri.

Presidenti i Republikës Stevo Pendarovski thotë se është fatkeqësi që kur politika nuk merret vesh në Kuvend, drejtohet në takime liderësh ku shanset për sukses janë më të vogla. Zotohet se mund të mbledhë takim liderësh nëse palët pajtohen, ndonëse mendon se një i tillë më i suksesshëm është kur në tryezë ka edhe ndërkombëtarë.

 “Nëse ka të huaj në tavolinë, me shumë gjasa presoni është më ndryshe. Megjithatë vetëm subjekte të vendit në takim liderësh, do të isha i lumtur nëse gaboj, nuk mendoj se këtu shanset janë të mëdha për sukses nëse i shohim se tani në Kuvend, para kamerave, në transmetim direkt, bëhen trima”, potencoi Stevo Pendarovski – President i Maqedonisë së Veriut.

Ndaj propozim-ligjit për shtetësi të propozuar nga opozita shqiptare, opozitarja VMRO-DPMNE dorëzoi rreth 500 amendamente. Nga ana tjetër, deputetët e shumicës dolën me mendimin e njëjtë si ai i Qeverisë që kritikon tekstin. Dje deputeti socialdemokrat Jovan Mitreski ftoi kolegët e opozitës shqiptare të ulen e të gjejnë zgjidhje në përputhje me standardet ndërkombëtare. Ripërsërit qëndrimin se pr/ligjin e dorëzuar nuk mund ta mbështesin, sepse nuk mund të rregullohet as me amendamente.