Sabedin Aliu ka 10 vjet që merret me kinematografi dhe është profesor universitar. Thotë se ka biografi të bujshme, por sërish projekti filmik i është refuzuar nga Agjencia e Filmit.
Ankohet edhe se procedura e përzgjedhjes nuk është transparente.“Ka plot artistë që e kanë dëshmuar veten, kanë bërë vepër dhe janë refuzuar. Kjo është për të ardhur keq. Fondi i filmit nuk ka asnjë të punësuar shqiptar, nuk dihet kush i lexon skenaret tona, nuk dihen kriteret e vlerësimit. Do të thotë gjithçka është enigmatike”, tha Sabedin Aliu – regjisor.
Skenaristi Aliu ende nuk e di se pse nuk iu është pranuar projekti. Ngjashëm edhe regjisori Arben Thaçi.
“Akoma nuk janë dorëzuar raportet me arsyetimin e refuzimit, pikët fituese dhe raporti i vlerësimit nga lexuesit e skenarëve. Unë së paku nuk e kam pranuar akoma, edhe pse rezultatet kanë dalë tashmë” deklaroi Arben Thaçi – regjisor.
Kanë reguar edhe regjisorët Antonio Mitriçevski, Llordan Zafranoviq dhe skenaristi Naum Paunovski.
Mitriçevski thotë se “viktimë nuk janë autorët, por veprat”, kurse Zafranoviq dhe Paunovski vlerësojnë se “Agjencia pamundësoi film për realitetin korruptiv në të cilën Maqedonia çdo ditë mbytet”.
Të gjithë kërkojnë transparencë nga drejtori i Agjencisë së filmit, Goran Tozja. Të dihen recensentët se kush kanë vendosur për filmat. Por drejtori thotë emrat nuk publikohet që mos të bëhet presion ndaj tyre gjatë përzgjedhjes së filmave. Ndërkaq, shton se nuk ka mundur të financojë më shumë projekte për shkak se Ministria e Kulturës ia ka shkurtuar mjetet.
“Ministri gjithmonë e shkurton. Mund të intervenojë. Shkurto këtu, shkurto atje. Ai neve nuk ka pyet se në çfarë gjendje jemi. T’i kishim ato para ndoshta edhe ndonjë film do të kalonte”, deklaroi Gorna Tozja – drejtor i Agjencisë së Filmit.
Përndryshe, Tozja dyshohet edhe për konflikt interesi dhe për procedurë të parregullt dhe antiligjore gjatë shpërndarjes së mjeteve për projektet por para se të publikohen rezultatet. Komisoni Antikorrupsion ka hapur tre procedura dhe ka kërkuar përgjegjësi nga Qeveria.