“E për këtë, sot duhet të gjithë ta përshëndetni këtë grua. Të thoni bravo për atë që e bëri dhe në çfarë mënyre menaxhon me gjithë situatën. E jo ta sulmojnë këtë grua këtu. Gjithë qyteti qëndron prapa saj. Sepse është e guximshme, është e vendosur dhe sepse e vetme iu kundërvu të gjithë atyre që asnjë burrë nuk ka guxuar të qëndrojë”, tha Danella Arsovska – Kryetare e Shkupit.
Kështu deklaronte tre muaj më parë e para e Shkupit, Danella Arsovska, duke mbrojtur veprimet e drejtoreshës së atëhershme të Higjienës Komunale, Kosana Mazneva për të shkarkuar dhjetëra punëtorë nga kjo ndërmarrje. Por kjo mbështetje zgjati shumë shkurt. Dje kryetarja Arsovska, vendosi ta shkarkojë atë nga funksioni. Mazneva në një deklaratë për TV21, thotë se nuk i di arsyet e shkarkimit, por nuk e përjashton mundësinë që të ketë prapavijë politike.
“Nuk mund t’ua them arsyet sepse nuk shkarkoj unë, ajo është në pozitë të shkarkojë. Nuk jam informuar fare për arsyet e shkarkimit, janë cekur vetëm disa akte të cituara nga ligji, asgjë konkretisht. Unë mundem vetëm t’u tregoj për sukseset e HK në periudhë kur unë isha drejtoreshë. Nuk e përjashtoj mundësinë për prapavijë politike, por nuk mund ta vërtetoj”, pohoi Kosana Mazneva – Ish drejtoreshë e HK.
Por siç deklaron Arsovska, Mazneva nuk i ka realizuar obligimet e saja nga programi i Qytetit të Shkupit.
“Përshkak se unë si kryetare e komunës thash se asnjë pozitë, nëse nuk realizohet ajo që është pjesë e programit të Qytetit të Shkupit, nuk i është e garantuar pozita. Kjo është ajo që po bëjmë për momentin, do t’i japim shans dikujt që besojmë se në gjashtë mujorin e ardhshëm nëse dëshmohet, do ta ketë shansin t’i realizojë këto përcaktime tona programore”, tha Danella Arsovska – Kryetare e Shkupit.
Përndryshe Mazneva Nikoliq u emërua drejtoreshë e Higjienës Komunale në korrik të vitit të kaluar, pasi atëkohë u shkarkua drejtori i atëhershëm Zudi Koka nga Aleanca për Shqiptarët. Mazneva është e fundit në listën e gjithsej 35 drejtorëve të shkarkuar nga ndërmarrjet dhe institucionet që janë nën kompetencë të Qytetit të Shkupit. Arsovska gjithashtu nuk ka bashkëpunim të mirë as me këshilltarët e Qytetit të Shkupit.