Bisedë e përgjuar 2011
Sasho Mijallkov dhe Dragan Pavloviq-Llatas
– Of, of, of…
– Rrinte i shtrirë aty rreth gjysmë ore, i lidhur ma pranga, erdhën gazetarët…e filmuan, e bënë llom…
– Le, le, le, le…
– Sasho Mijallkov ma skenoi…i rridhnin lot…!
Spektakle arrestimesh Maqedonia e Veriut ka parë shpesh! Ky audio-përgjim mes shefit të Drejtorisë për siguri dhe kundërzbulim dhe një gazetari, dëshmon se sa të vëmendshëm ishin që prangosja e dikujt të ndodhte para kamerave! Arrestimet edhe paralajmëroheshin në media!
Bisedë e përgjuar 2011
Sasho Mijallkov dhe Emil Stojmenov
-Dërgo tani kamera në gjykatë.
-Mirë.
-Do ta çojnë në gjykatë. Gjithashtu para “Vodenicës” mund të kesh kamerë.
-Kam…
-Dëgjo, të lëshohen origjinal siç janë, jo të mjegulloni ndonjë gjë…
E kamerat nuk mungojnë askund!
“Diktatura në vepër! Kjo është demokracia e Gruevskit”, tha Velija Ramkovski – Pronar i A1-TV.
Spektaklet vazhduan më pas edhe me rastin “Montstra”, pamje që vetë Ministria e Brendshme i publikonte në Youtube, ku gjenden edhe sot, pavarësisht se rasti është në rigjykim sepse ka dyshime për procesin gjyqësor që mund të jetë manipuluar.
E spektaklet e arrestimeve nuk kanë të ndalur! Ndër të fundit i publikuar në kanalin e MPB-së në Youtube është arrestimi i tre të dyshuarve për terrorizëm dhe konfiskimi i armëve.
Syrit të publikut nuk i iku dot as ish-Ministrja e Brendshme, Gordana Jankullovska, për të cilën ditë më parë në çdo titull lajmi theksohej se me pranga u soll në gjykatë.
Këto pamje bënë që të reagojë edhe ish-ministrja e Drejtësisë, Renata Deskoska, e cila thotë se rregulli “sy për sy” nuk bën për sistemet demokratike!
“Nuk bëhet fjalë për veprime të gabuara të policisë por bëhet fjalë për atë që quhet sjellje etike e mediave! Duhet të mbajmë llogari se informimi për proceset gjyqësore për cilindo ish-zyrtar është interes publik, por fotografia që përcillet jo gjithnjë është në interesin publik. Mund të dërgohet foto që nuk do të shkelë dinjitetin”, theksoi Renata Deskoska – profesoreshë e drejtësisë.
Padyshim që publiku duhet të informohet, por informimi duhet të bëhet duke ruajtur dinjitetin e personave të arrestuar, thotë profesoresha e drejtësisë Deskoska duke shtuar se pamjet me pranga janë justifikueshme vetëm kur është e domosdoshme.
“Kur ekzistojnë arsye të justifikueshme, në atë rast nuk keni shkelje të dinjitetit sepse ka mbizotëruar interesi për parandalim të arratisjes, dhunës…”, tha profesoresha e drejtësisë, Renata Deskoska.
Ish-gjykatësja në Gjykatën evropiane për të drejtat e njeriut, Margarita Caca-Nikollovska, arrestimet spektakolare vënë në pikëpyetje privatësinë, prezumimin e pafajësisë dhe dinjitetin e të arrestuarit në kohë kur procedura ende s’ka filluar ose nuk ka epilog.
“Ndryshe është puna kur ka vendim fuqiplotë, shkuarja në burg, kur ju gazetarët keni ndonjë informacion dhe e keni incizuar, megjithatë edhe këtu duhet pasur parasysh balanci interesit publik dhe të drejtës së informimit! Unë nuk mund të them se kur një arrestim spektakolar mund të konsiderohet tërësisht interes publik. Ka disa elemente që duhet të konfirmohen dhe është shumë e rëndësishme kush i prezanton ato pamje. Nëse është gazetar që ka incizuar ose ka qenë i pranishëm aty, nëse i prezanton gazetar që punon në shërbim publik, televizion privat apo është ndonjë shërbim nga autoritetet shtetërore”, deklaroi Margarita Caca-Nikollovska – ish-gjykatëse në Strasburg.
Nikollovska thotë se raste të këtilla mund të vërehen edhe në shtete perëndimore, duke qenë se gazetarët gjurmojnë ngjarjet interesante, megjithatë apelon që të veprohet me përgjegjësi dhe sipas standardeve!