Angeloska-Bezhoska në takim me drejtoreshën e FMN-së: Nevojitet mbështetje më e madhe nga FMN-ja dhe institucionet e tjera financiare ndërkombëtare

Në kuadër të takimeve pranverore të FMN-së dhe Bankës Botërore, që po zhvillohen në mënyrë elektronike këtë vit, u mbajt takim i kryesuar nga drejtoresha e FMN-së, Kristina Georgieva, në të cilin parashikimet e fundit të FMN-së u prezantuan nga Drejtori i Departamentit për Evropën, Pol Tomsen. Si diskutues të takimit, siç kumtoi Banka Kombëtare u ftuan guvernatorja e Bankës Kombëtare, Anita Angelovska-Bezhoska, dhe guvernatorët e Bankave Qendrore të Federatës Ruse dhe Kroacisë, Elvira Nabiulina dhe Boris Vujçiq.

Në diskutim, theksi iu vu efekteve të pandemisë Kovid-19 në ekonomitë evropiane, si dhe politikave ekonomike që realizohen dhe sfidave kryesore të paraqitura nga rrethanat e reja. Përveç kësaj, Angelovska-Bezhoska i theksoi politikat makroekonomike të ndërmarra në vendin tonë dhe në vendet e tjera të rajonit, duke e theksuar sfidën e sigurimit të burimeve financiare me qëllim të zbatimit të masave të politikës fiskale që duhet t’i zbusin efektet negative në ekonomi për shkak të gjendjes me virusin Kovid-19.

Guvernatorja theksoi se në kushte të tregjeve të brendshme financiare më pak të zhvilluara, ekonomitë nga rajoni ynë kanë një nevojë më të theksuar për financim të jashtëm. Duke e marrë parasysh se kriza e koronës ka çuar në shtrëngimin e tregjeve ndërkombëtare financiare private, ajo veçmas iu kthye edhe nevojës për mbështetje më të madhe nga FMN-ja dhe institucionet e tjera financiare ndërkombëtare, si dhe nevojës për mbështetje nga institucionet evropiane.

Si anëtare e Bordit mbikëqyrës të nismës së Vjenës, që i përfaqëson gjashtë vendet e Evropës Juglindore që nuk janë ende anëtare të Bashkimit Evropian, Angelovska-Bezhoska merr pjesë në mënyrë aktive edhe në diskutime për qasje të koordinuar për tejkalimin e sfidave me të cilat përballen vendet në rajonin tonë në këtë periudhe. Ndër të tjera, zgjidhjet për të cilat u diskutua përfshijnë fillimin e mbështetjes së zgjeruar financiare nga burimet e Bashkimit Evropian.

Në kuadër të takimeve pranverore të FMN-së dhe Bankës Botërore, guvernatorja e Bankës Popullore do të marrë pjesë edhe në takimin e Konstituencës ku vendi ynë është anëtar./MIA