Anëtare e NATO-s me kallashnikovë! Shënohet Dita e Brigadës së parë të Këmbësorisë

U bënë dy vite që Maqedonia e Veriut është anëtare e NATO-s, por në ushtrinë e saj vazhdon të përdoret kallashnikovi rus, i prodhuar në Serbi.

Që ushtria të jetë në përputhje me standardet ushtarake të NATO-s, duhet që ta ndryshojë kalibrin e armëve, nga 7,62 mm siç është kallashnikovi të kalojë në armë me kalibër 5,56 mm. Jo vetëm kjo, por edhe shumë pajisje të tjera ushtarake të vendit janë të vjetra. Tashmë kohë të gjatë ka plan operacional për modernizimin e armatës sipas standardeve të NATO-s, por ky plan ecë ngadalë. Pjesë e madhe e armëve të reja që ka ARM-ja, janë donacione nga vendet aleate. Po edhe përskaj mungesave të shumta që mund të ketë armata në pajisje, kjo nuk i ka penguar ministra e politikanë ta lavdërojnë për profesionalizmin dhe gatishmërinë. Njëjtë bëri edhe Ministrja e Mbrojtjes sot në ditën e Brigadës së Parë të Këmbësorisë.

 “Me profesionalizmin dhe gatishmërinë tuaj në kryerjen e detyrave në misionet ndërkombëtare morët të gjitha vlerësimet nga komandantët e armatave të vendeve aleate dhe treguat se Armata e Maqedonisë së Veriut jo rastësisht është armatë e NATO-s. Dhe ju e vërtetoni atë çdo ditë. Ju, pjesëtarët e Brigadës së Parë të Këmbësorisë më mirë do t’i prezantoni aftësitë dhe gatishmërinë tuaj luftarake nga nesër kur do të fillojë stërvitja “Blesok 22”.”, tha Sllavjanka Petrovska, ministre e Mbrojtjes.

Komandanti i Komandës Operative, gjenerali i brigadës Besnik Emini, u shpreh se është niveli i gatishmërisë ushtarake të vendit është përmirësuar dukshëm falë punës dhe përmirësimit të kushteve që ka sjellë rritja e buxhetit që ndahet për ushtrinë.

 “Në vitet e kaluara vazhdimisht kemi punuar në përmirësimin e aftësive dhe shkathtësive të ekipeve tona në fushën e operacioneve dhe të gatishmërisë luftarake. Kjo vazhdimësi vjen si pasojë e rritjes së përqindjes së mjeteve të ndara nga bruto-prodhimi vendor që janë investuar për modernizimin dhe pajisjen e Armatës në përputhje me planin afatgjatë për zhvillim dhe modernizim. Si rezultat i atij procesi, statusi ynë i gatishmërisë është rritur dhe përmirësuar dukshëm”,  theksoi Besnik Emini, komandant brigade – komandant i Komandës për Operacione.

Ministrja Petrovska theksoi se në periudhën e ardhshme do të ndërmerren hapa seriozë për modernizimin e pajisjeve dhe se sipas rritjes së buxhetit të mbrojtjes, i cili këtë vit është 1.77% e PBB-së, ku mbi 30% do të ndahen për modernizim.