Andonovski paralajmëron “roaming si në shtëpi” mes Maqedonisë dhe BE-së

Në Samitin Digjital të Ballkanit Perëndimor 2025 (WBDS25), i cili do të mbahet më 1 dhe 2 tetor në Shkup, pritet që vendet e Ballkanit Perëndimor të miratojnë një deklaratë të përbashkët me thirrje drejtuar BE-së që të përshpejtohet procesi “roaming si në shtëpi” dhe zero kosto për internet për qytetarët tanë në BE.

Bashkimi Evropian para një muaji publikoi një udhërrëfyes se çfarë duhet të përmbushin shtetet për t’u bërë pjesë e kësaj zone, por nevojitet edhe veprim nga ana e saj.

“Ne detyrimet tona do t’i përfundojmë deri në dhjetor 2025 dhe pres që vitin e ardhshëm të jemi të parët që do ta nënshkruajmë marrëveshjen për roaming pa kosto për qytetarët e Maqedonisë”, tha sot ministri për transformim digjital, Stefan Andonovski.

Sipas tij, Maqedonia është shumë përpara sa i përket përmbushjes së kushteve.

Ministria e Punëve të Brendshme sot promovoi shërbimin e përmirësuar për lëshimin elektronik të dëshmisë së shtetësisë, e cila është në dispozicion përmes portalit kombëtar për e-shërbime uslugi.gov.mk.

“Kyç ishte ndryshimi i Ligjit për Komunikime Elektronike për të përmbushur rregulloret dhe direktivat kryesore të BE-së, gjë që e bëmë tashmë këtë verë. Mbeten edhe disa aktvendime nënligjore që duhet t’i përfundojmë deri në fund të vitit dhe me këtë do t’i kemi përmbushur kushtet. Jemi në fazë të avancuar, kemi përgatitur Planin tonë të Veprimit dhe mendoj se do të jemi të parët nga rajoni”, theksoi Andonovski në konferencë për shtyp, duke iu përgjigjur pyetjeve të gazetarëve.

Ai sqaroi se, në parim, çdo shtet i Ballkanit Perëndimor është përgjegjës për veten.

“Herën e kaluar, kur u nënshkruan marrëveshjet për roaming në Ballkanin Perëndimor, i nënshkruan të gjitha shtetet njëkohësisht. Këtë herë, duke qenë se lidhet me BE-në, pritet që secili shtet të nënshkruajë veçmas. Plani i BE-së është për të gjitha vendet e Ballkanit Perëndimor. Kjo do të diskutohet në Samitin Digjital të Ballkanit Perëndimor 2025 dhe shpresoj të kemi një përgjigje më konkrete, por detyrimi ynë është të jemi të përgatitur deri në janar”, tha ministri./TV21