Ahmeti nuk mendon se “27 prilli” ishte “akt terrorist”

Kreu i Bashkimit Demokratik për Integrim, Ali Ahmeti, mbetet në qëndrimin se kualifikimi “akt terrorist” është tepër i rëndë për të përfshirët në ngjarjet e 27 prillit.

“Këto ngjarje janë të dhimbshme, është ushtruar dhunë ndaj përfaqësuesve të popullit, është ushtruar brutalitet, por jo edhe vlerësimi akte terroriste, dihet se cilat janë aktet terroriste dhe çfarë kualifikimi është akti terrorist, kështu që mendoj se organet e drejtësisë ta zbërthejnë tërë situatën, është situatë tepër e komplikuar”, u shpreh ai.

Për t’u quajtur akt terrorist, duhet të ishte mënyrë tjetër e veprimit, tha kreu integrist, duke shtuar se masa që hyri në Kuvend ka qenë euforike dhe mllefosur, megjithatë sipas tij organet e drejtësisë duhet ta thonë nëse kanë qenë të organizuar ose vetëorganizuar. Uroi që sa më shpejt të ketë një epilog.

Para se Ahmeti të përgjigjet për këto, pyetëm edhe kreun e Aleancës për Shqiptarët Ziadin Sela nëse mendon se ka vend për rigjykim të 27 prillit.

“Fillimisht do donim të dëgjojmë qëndrimin e Ali Ahmetit në lidhje me këtë çështje. A vazhdon të mendojë se pjesëmarrësit në ndodhitë e 27 prillit nuk janë terroristë dhe kanë vepruar me emocion”, thanë nga ASH-ja për TV21.

Edhe pas përgjigjes së Ahmetit, përgjigje tjetër nga Sela nuk morëm.

Kjo çështje është hapur pasi ditë më parë edhe Presidenti i vendit Stevo Pendarovski u shpreh se nuk mendon se janë terrorist ata që u futën në Kuvend, në natën e përgjakshme të 27 prillit. Para kësaj deklarate, kreu i opozitares VMRO-DPMNE, Hristijan Mickoski, mbështeti një protestë që kërkon lirimin e të përfshirëve në këto ngjarje. Kryeministri Zaev ka thënë se asnjëherë me Mickoskin nuk ka biseduar për amnistimin e të dënuarve për rastin e 27 prillit./TV21