As me 46 deputetë nuk mund të bëhet kryeministri. Kështu lideri i Bashkimit Demokratik për Integrim, Ali Ahmeti i është përgjigjur liderit të Lidhjes Social Demokrate të Maqedonisë, Zoran Zaev ku thotë, se “Me 15 deputetë nuk mund të merret kryeministri”.
Ahmeti për Gazetën “KOHA” ka deklaruar se partia që e udhëheq ai është faktor stabiliteti dhe ka përsëritur kushtet për pjesëmarrje siç janë: zbatimi i Marrëveshjeve si ajo e Ohrit, e Prespës, e fqinjësisë së mirë me Bullgarinë dhe Ligjit për përdorimin e gjuhëve.
“As me 46 deputet, prapë nuk bëhet kryeministri. Në këtë situatë të gjitha palëve u duhet qetësi, urtësi dhe të mendojnë për interesa të larta të shtetit. Unë një mund të them, se BDI është faktor stabiliteti në vend. Ne me kujdes I analizojmë situatat, nuk do ngutemi. Çdo veprim që do e bëjmë, do e bëjmë në dobi dhe interes të shtetit, të paqes, stabilitetit dhe të çuarjes përpara të proceseve madhore, siç është Marrëveshja e Ohrit Marrëveshja e Prespës, Marrëveshja për fqinjësi të mirë, Ligji për implementimin e gjuhës të zbatohet në germë dhe frymë, si dhe vetingu, lufta kundër krimit dhe korrupsionit. Por në asnjë mënyrë ti shmangemi Vetingut. Të gjithë do të jenë në partneritet me ne në dakordimin e këtyre pikave. Duke përfshirë këtu edhe kryeministrin”, tha kryetari i BDI-së, Ali Ahmeti.
Një ditë më parë, pas seancës konstituive, Zaev i tha Ahmetiti se nuk bëhet kryeministër me 15 mandate.
Njohësi i çështjeve kushtetuese dhe politike, Jusuf Zejneli thotë se deklaratat e Zaevit dhe Ahmetit tregojnë se asnjëri s’i ka numrat dhe se do të kemi Qeveri të zgjeruar.
“Edhe pse zgjedhja e Qeverisë është çështje kushtetuese, tani për momentin ajo është më çështje politike. Kushtetuta u hap rrugë partive politike dhe në këtë moment asnjë parti politike nuk e ka shumicën absolute në Kuvend, nuk i ka numrat e duhur. (10:27) Shihet pak a shumë, se numrat tregojnë se do të jetë një qeverisje me koalicion me të gjerë. Është e vështirë të jetë një koalicion i ngushtë”, u shpreh Jusuf Zejneli, njohës i politikës dhe Kushtetutës.
Megjithatë, ai propozon se koalicionet duhet të kalojnë në fazë më të pjekur, të bazohen në programe dhe në sundimin e ligjit dhe drejtësisë.
“Mendoj se gradualisht duhet të kalojmë në një fazë më të pjekur të qeverisjes, ajo që ishte edhe esenca më kruciale dhe sugjerimet e komunitetit ndërkombëtar që kanë të bëjnë me sundimin e ligjit në vend”, theksoi Jusuf Zejneli.
Koalicioni “Mundemi” mes LSDM-së dhe BESËS në zgjedhjet e 15 korrikut ka siguruar 46 deputetë, ndërkaq BDI 15 deputetë. Që të dy partitë kanë në lojë kandidat për kryeministër. Mundemi e ka Zaevin, e Ahmeti e ka Naser Zyberin.