Nga 20, vetëm dy filma shqiptarë janë financuar nga Agjencia e Filmit të Maqedonisë së Veriut. Bëhet fjalë për filmat “Koma” nga Agim Abduli dhe “Emigrant jam apo jo?” me regjisor Senad Abdulin.
Këto rezultate janë cilësuar si diskriminuese për shqiptarët nga komuniteti artistik si dhe nga zyrtarë të Ministrisë së Kulturës. Gishti drejtohet kah drejtori i Agjencisë së filmit, Goran Tozija për të cilin thonë se qëllimshëm po diskriminon artistët shqiptarë.
Aziri madje kontestuese e sheh edhe kohën kur janë publikuar rezultatet, pasi ato u publikuan dy ditë pas zgjedhjeve më 17 korrik.
Kritika ka drejtuar edhe këshilltari në Ministrinë e Kulturës, Visar Vishka i cili ka konkuruar në Agjencinë e filmit si produksion filmi.
Ndaj të dyve është përgjigjur drejtori Tozija. Për Azirin thotë se po e sulmon politikisht në kohë të zgjedhjeve.
Ndërkaq për Vishkën thotë se nuk e ka pasur të plotë dokumentacionin.
Por këto nuk janë të vetmet ankesa ndaj drejtorit Tozija. Te Komisioni për Antikorrupsion kanë arritur dy ankesa për konflikt të interesit për projektet e fundit dhe një rast për ndarjen e mjeteve nga konkursi para se të shpallen rezultatet. Për këtë ata kërkojnë nga Qeveria përgjegjësi për Tozijan.
Për këtë Tozija ka angazhuar avokat por sërish vlerëson se edhe Antikorrupsioni po i bën presion politik.