“Afati i VLEN-it për kushtetutën nuk është ultimatum” – Mickoski: pse të mos ketë aneks propozimi francez

Afatin gjashtëmujorë për ndryshimet kushtetuese që e përmendte koalicioni VLEN nuk paraqet ultimatum për pjesëmarrje në Qeveri. Këtë e theksoi ministri për çështje europiane, Orhan Murtezani, në prezencë të kryeministrit Hristijan Mickoski, i cili disa herë përsëriti se ai nuk punon me afate dhe ultimatume. Ministri Murtezani, në një intervistë televizive, para pak kohësh, deklaroi se pret që të gjendet zgjidhje për ndryshimet kushtetuese deri në dhjetor të këtij viti.

“Kjo ishte tema për të cilën u bisedua gjatë formimit të Qeverisë, pa u vendosur në tavolinë si ultimatum, por si brengë që të përshpejtohet integrimi i vendit në BE”, tha ministri Orhan Murtezani.

“Qëndrimin tonë e dini të gjithë ju, e dëgjuat edhe qëndrimin e ministrit për çështje europiane”, tha kryeministri Hristijan Mckoski.

Kryeministri Mickoski përsëriti se po punohet për gjetjen e zgjidhjes për rrugën eurointegruese, por për këtë pret qeveri të qëndrueshme politike në Bullgari, me të cilën do të hapej dialog mes dy vendeve për zhbllokimin e procesit eurointegrues.

“Ne jemi fqinj, duhet të ndërtojmë marrëdhënie të mira fqinjësore. Në fakt, ne kemi një marrëveshje të tillë, e kjo është marrëveshja për fqinjësi të mirë që duhet të jetë bazë që të mund të vazhdojmë më tutje. Këto të dhëna të tipit “propozim francez” mund të kenë një aneks- “propozim plus francez””, deklaroi Mickoksi.

Nga ana tjetër ambasadori bullgar në vend, Angell Angellov paraprakisht tha se mes dy vendeve duhet të hapet dialog por jo edhe negociata të reja për diçka që tashmë është dakorduar.