Administrata e gjykatave në protestë / “Jemi në kufi, dikush ende merr pagë 18.500 denarë”

Me melodinë e këndës “Bela ciao” dhe me pankarta me mbishkrimin “Paga europiane”, administrata e gjykatave protestoi para Gjykatës Themelore në Shkup.

Në këtë mënyrë Sindikata e Pavarur e Administratës Shtetërore dhe Sindikata e Pavarur e Shërbimit Gjyqësor e shprehën pakënaqësinë për pagat e ulëta dhe mosmarrjen e shtesave.

“Për shkak se në kuadër të Këshillit Gjyqësor nuk na dëgjojnë, e kishim patjetër që e organizuam protestën dhe do të vazhdojë edhe në të ardhmen nëse nuk respektohen kërkesat tona – rritje adekuate e pagave në krahasim me koston e jetesës. Rritje pagash prej 30 për qind ka pasur për një pjesë të Ministrisë së Financave. Pakënaqësia është e madhe, jo vetëm në sistemin e drejtësisë, por edhe më gjerë”, tha Goran Ristevski nga Sindikata e Pavarur e Administratës Shtetërore.

Kërkesat tona askush nuk i dëgjon, madje as Këshilli Gjyqësor, ankohen sindikalistët, duke shtuar se janë në kufi dhe gjendja nuk mban më!

“Besoni se jemi në margjina. Zyrtarët në gjykata punojnë edhe nga dy turne, edhe pasdite, edhe në dy punë të ndryshme që ta ushqejnë familjen”, tha Jasmina Veliçkova nga Sindikata e Pavarur e Shërbimit Gjyqësor.

“Do të doja shkurt t’i pyesja zyrtarët që vendosin për shtesat dhe rrogat e shërbimit gjyqësor se a e dinë se ka korrierë, mbajtës procesverbali dhe arkivistë që punojnë për 18.500 denarë. Do t’i lusja që të përllogarisin se sa është dallimi 18.500 deri në 180.000 denarë që ata i marrin në muaj?!”, u shpreh Renata Georgievka, nënkryetare e Shoqatës së Administratës së Gjykatave.

Udhëheqësia e gjykatës doli me deklaratë se mbështet plotësisht përpjekjet e Sindikatave të shërbimit gjyqësor.

“Zyrtarët e gjykatave janë një hallkë kyçe në zinxhirin e pushtetit gjyqësor dhe kanë një rol shtytës në realizimin e të drejtave të qytetarëve përpara proceseve gjyqësore. Për këtë arsye ne besojmë se kërkesat e tyre janë të justifikuara dhe të nevojshme për funksionimin dhe zhvillimin e mëtejshëm të sektorit të drejtësisë”, thanë nga Gjykata Themelore Shkup.

Protesta u bë për të gjitha gjykatat e shtetit.