A po zbatohet gjuha shqipe nga institucionet? Sela: Ka edhe institucione që udhëhiqen nga shqiptarë, por nuk e zbatojnë

TË FUNDIT

Mbrëmë në emisionin Eu Click drejtori Agjencisë për Zbatimin e Gjuhëve tha se ka edhe institucione që udhëhiqen nga shqiptarët e që nuk e zbatojnë gjuhën shqipe.

“Do ta themi hapur jo vetëm tek maqedonët, ka edhe udhëheqës shqiptar ku gjuha shqipe ngec në institucione. Edhe ato nga inspektorati do të dënohen kur inspektorati të kompletohet”, tha drejtori i Agjencisë për Zbatimin e Gjuhës, Ylber Sela.

Cilat ishin detyrat që u jepte institucioneve kjo Agjenci, ndërsa për disa muaj ata duhej që t’i kryenin këto detyra.

“Faza e parë, institucionet e kishin për detyre ta bëjnë i kishin tabelat mbishkrime, ishin memorandumet vulat, kjo ishte pjesa e parë.
Një institucion në fazën e parë kishte afate gjashtë mujor që t’i bëjë të gjitha këto.
Në gjashtë mujorin e dytë kishte të bëjë me harmonizimin e ligjit”, theksoi Ylber Sela, drejtor i AZGJ-së.

Themelimi i këtij institucioni sigurisht që ka pasur edhe sfida, ndërsa Sela thotë se edhe për atë vetë kjo ka qenë një sfidë.

“Ata të cilët e kanë themeluar institucionin, normalisht atë e bëjnë Kuvendi dhe Qeveria, por ata të cilët i vëjnë në zbatim është punë shumë e rëndë. Të vësh në funksion një institucion unë kam qenë vetë i emëruar, nuk kam pasur as zyrë as ekip dhe kjo për mua ka qenë një sfidë”, deklaroi drejtori i AZGJ-së, Ylber Sela.

Në Agjencinë e Zbatimit të Gjuhës në Shkup para disa ditëve u promovua Doracaku i nëpunësve administrativë, lidhur me zbatimin e Ligjit të Përdorimit të Gjuhëve. Në përpilimin e këtij doracaku kanë marrë pjesë: gjuhëtarë, mësimdhënës, punonjës shkencorë nga vendi dhe nga jashtë, duke shpresuar se nëpunësve administrativë do t’ju bëhet ndihmës kryesor në punën e përditshme të tyre.