A po përpiqet Qeveria të hesht zërat kritik? Petreski thotë se kjo nuk do të ndodhë, Ademi po e rimendon angazhimin

Në listën e platformës “Për atdheun me dashuri” me ekspertë të ekonomisë, që pa pagesë do ta këshillojnë Qeverinë, ka edhe figura që gjithnjë pa ngurrim kanë folur për politikat ekonomike, si Goran Rafajlovski, Visar Ademi e Bllagica Petrevski.  Po a do ta kufizojë tani lirinë e tyre të shprehjes ky angazhim falas në kabinetin e zëvendëskryeministrit për çështje ekonomike.

Ekonomistja Bllagica Petreski thotë se, që në fillim është pajtuar me zv/kryeministrin se mendimi kritik për politikat ekonomike është kyçe për qëndrueshmërinë e tyre, andaj nuk do të lejojë asnjë ndikim mbi mendimet e saj.

 “Absolutisht jo. Unë që kur e mora ftesën nga zëvendëskryeministri Bytyqi, unë tregova se mendimi kritik është shumë i rëndësishëm për shëndetin dhe qëndrueshmërinë e politikave ekonomike dhe një prej parakushteve të mia ishte se unë dua ta mbaj atë pavarësi dhe mendim kritik që jo vetëm në këtë periudhë, por e kam dëshmuar edhe funksionimin e rreth 3 qeverive”, tha Bllagica Petreski – ekonomiste.

Petreski mendon se integriteti i tyre si profesor nuk duhet vënë në pikëpyetje, ndërsa tregon se përveç që nuk do të paguhen për këshillat që do të japin, po ashtu nuk kanë firmosur asnjë lloj marrëveshjeje bashkëpunimi me Qeverinë.

Kolegu i saj, ekonomisti Visar Ademi, po ashtu pohon se janë marrë vesh me zëvendëskryeministrin që ky angazhim  nuk do të jetë për të mbajtur politikat qeveritare, por Ademi tani po e rimendon angazhimin pasi emrat e ish-zyrtarëve të VMRO-DPMNE-së, Vlladimir Peshevski dhe Kirill Minovski u përfolën se do të jenë pjesë e platformës.

 “Unë kam pasur marrëveshje me Fatmirin (meqë është punë pa pagesë) që asnjë obligim nuk kam të mbroj ndonjë politikë që ka qeveria. Fundja kjo është vetëm trup këshillëdhënës dhe jo vendimmarrës. Pasi pash disa nga VMRO-ja tani e mendoj seriozisht angazhimin e mëtutjeshëm”, u shpreh Visar Ademi – ekonomist.

Deputetja e opozitares Aleanca për Shqiptarët, Ilire Dauti, platformën  “Për atdheun me dashuri” e sheh si mungesë të ideve dhe vizionit të Qeverisë për të përballuar krizën ekonomike.

“Kjo Qeveri jo vetëm në ekonomi, por ka dështuar në gjitha fushat. Prandaj, përveç rehabilitimit të disa figurave të regjimit Gruevski, vlerësojmë se kjo nismë është vetëm një tentim i radhës për të fshehë dështimin e tyre dhe për të amortizuar zërat kritik”, potencoi Ilire Dauti – deputete e ASH-së.

Pas spekulimeve për angazhimin e mundshëm të ish-funksionarëve të VMRO-DPMNE-së, listën përfundimtare e publikoi vetë zv/kryeministri për çështje ekonomike Fatmir Bytyqi, ku nuk figurojnë emrat e Peshevskit dhe Minovskit. Gjithsej janë 22 njohës të fushës, ndërsa Bytyqi ka pohuar se ekipi do të ndryshohet, varësisht temës.