Vazhdojnë negociatat për zgjerim të Frontit Europian edhe me partitë tjera shqiptare pasi dje BDI dhe Lëvizja Populli nënshkruan të parët marrëveshjen për pjesëmarrje të përbashkët në zgjedhje. Siç njoftoi dje kreu i BDI-së Ali Ahmeti, negociatat kanë filluar tanimë një kohë të gjatë dhe të njëjtat do të vazhdojnë me ASH-në, PDSH-në dhe PDE-në, por edhe me parti turke, rome e boshnjake.
Mirëpo, burime të TV21 thonë se ka pakënaqësi tek ASH-ja e Selës dhe PDE-ja e Arjanit Hoxhës rreth ofertës së integristëve për pozitat në listat e kandidatëve për deputetë. Burimet thonë se Hoxhës i janë ofruar pozita jo fituese në listën zgjedhore nr6, pra të jetë i teti në renditje ndërsa në zonën dy, Bastri Bajrami është lënë i pesti në renditje. Sa i përket ASH-së, në zonën dy fillimisht Elmi Aziri ishte paraparë i dyti në renditje ndërsa më vonë është zbritur i katërti.
Për këto, kontaktuam me të dy partitë. Pyetëm kreun e ASH-së Ziadin Sela nëse me të vërtetë ka pakënaqësi gjatë zhvillimit të bisedimeve për koalicionim, por i njëjti na tha që kur të ketë diçka për të thënë, do të na thërrasë vetë. Naim Bajrami, aktualisht ministër dhe zëdhënës i ASH-së, mbrëmë i tha TV21 se opinoni tashmë është i njoftuar se ASH ka një vendim të mëhershëm, por se a do të ketë vendim tjetër ditëve në vazhdim, sipas tij, ngelet për t’u diskutuar në organet partiake. Kujtojmë se ASH-ja e Selës deri më tani ka vetëm një vendim në lidhje me daljen në zgjedhje, e ai është që të dalin vetë, pa ndonjë koalicion, gjersa Sela më parë ka mohuar që të ketë ndonjë marrëveshje me integristët.
Nga ana tjetër edhe kreu i Partisë Demokratike Europiane, Arjanit Hoxha, i pyetur nëse nuk arrijnë akord me BDI-në mund të shkojnë bashkë me ASH-në ndaras nga BDI, na tha se në politikë gjithçka është e mundur dhe pritet që deri të premten të definohet gjithçka.
Përndryshe në zgjedhjet e fundit parlamentare në vitin 2020, Bashkimi Demokratik për Integrim pa asnjë koalicion, fitoi 15 deputetë. Në zonën gjashtë BDI arriti të nxjerrë shtatë deputetë, në zonën 5 tre deputetë, në zonën 2 tre deputetë dhe në zonën 1 – dy deputetë.