A nisi apo jo mësimi në Vizbeg? Drejtori tha se do të nisnin sot, kryetari thotë javën e ardhshme

Ende nuk dihet se a ka filluar zyrtarisht mësimi në shkollën e re të Vizbegut. Disa të punësuar që qëndronin tek dera, thanë se mësimi as sot nuk ka nisur, edhe përkundër paralajmërimit të drejtorit dje se shkolla do të nisë sot me mësim. Por një tjetër person, që na u prezantua si mësimdhënës në këtë shkollë, na tha se sot kanë mbajtur mësim.

“Jemi këtu tek shkolla fillore në Vizbeg ku tentuam të hyjmë brenda për të incizuar se ka filluar mësimi, mirëpo dolën disa mësimdhënës dhe na treguan “se nuk kemi të drejtë të incizojmë” dhe se drejtori nuk do të japë deklaratë, nuk na dhanë asnjë përgjigje konkrete se a ka filluar mësimi apo jo? Dhe se kur do të fillojë konkretisht”, raporton Fazile Halili, gazetare e TV21.

Biseduam me një prind në telefon, i cili na tha se fëmija i tij sot ka qenë në shkollë dhe se ka mbajtur vetëm 2 orë mësim.

Kryetari i Butelit, Darko Kostovski, na tha se shpallja për punësim ende po zgjatë dhe se nesër do të zgjidhet kuadri nga ana e Komisionit. Shtoi se mësimi pa pengesa do të fillojë nga java e ardhshme.

Disa herë gjatë ditës u përpoqëm të kontaktojmë drejtorin e shkollës së re Kadri Elezi, por nuk morëm përgjigje në lidhje me procesin mësimor në shkollën që ai drejton dhe që ka një muaj që po vonohet.