A ka keqpërdorime në importin e qymyrit? Aliu mohon: Importi bëhet vetëm nga Kosova

Pas raportimit të TV21 për dyshimet se një pjesë e qymyrit që përdor TEC Osllomej, vjen nga Greqia por deklarohet si nga Kosova, kontaktuam me pronarin e kompanisë importuese Promet Steel Holding, Abedin Aliu. Edhe pse me Aliun fillimisht u dakorduam që të marrim deklaratë para kamerës, megjithatë më pas na tha se nuk do të mundet, pasi që i duhej të udhëtonte për në Kosovë. Abedini na tha se lirisht mund ta citojmë bisedën telefonike. Kështu, ai pohon se ka 3 vite që importon qymyr në vendin tonë, por i mohoi si të pavërteta informacionet që erdhën deri tek TV21, se qymyrin që e merr nga Greqia e deklaron si nga Kosova.

 “Promet Steel Holding gati 3 vite importon qymyr për nevojat e TEC Osllomej. Një pjesë blihet në Berovë, ndërsa pjesa tjetër importohet nga Kosova. Nuk është e vërtetë se kompania që unë drejtoj blen qymyr në Greqi ndërsa e deklaron si nga Kosova. Nëse doni ta vërtetoni këtë gjë, shumë lehtë dëshmohet në doganë ku edhe janë kamionët që bartin qymyrin direkt nga Kosova”, tha Abedin Aliu, pronar i promet Steel Holding.

Sipas informacioneve jozyrtare të TV21, kompania që ka kontratë për furnizimin me qymyr të TEC Osllomej, qymyrin e blen nga Greqia, por e importon në vendin tonë si qymyr kosovar. Gjoja e gjithë kjo është bërë sepse është opsion më i lirë. Drejtori i EMV-së thotë se gjithçka është e ligjshme.

 “Sa i përket furnizimit me qymyr për TEC Osllomej ne aktualisht kemi dy marrëveshje. Një marrëveshje me kompani që furnizon me qymyr dhe e importon një pjesë nga Greqia dhe një pjesë nga kapacitet vendore që është miniera në Berovë me sasi të përgjithshme 130.000 ton. Nuk ka informacione të tilla se qymyri importohet nga Greqia ndërsa deklarohet si nga Kosova. Këtë e them me shumë përgjegjësi, mund ta vërtetojnë edhe institucionet kompetente”, theskoi Vasko Kovaçevski , drejtor i përgjithshëm i EMV.

Mirëpo, drejtori i EMV-së, Osllomej, madje edhe Dogana, të cilët i pyetëm për këtë, nuk ishin të sinkronizuar në përgjigjet e tyre. Vasko Kovaçevski thotë se importojnë vetëm nga Kosova, ndërsa një sasi të caktuar e kanë sjellë nga Greqia sa për provë. Drejtori i EMV-së thotë se nga Serbia nuk importojnë fare qymyr. Por çfarë thonë të dhënat e Drejtorisë doganore? Dokumentet e tyre nuk kanë import të regjistruar të qymyrit nga Greqia në vendin tonë, por vetëm nga Kosova dhe Serbia. Kjo është në kundërshtim me pretendimin e drejtorit të EMV-së, Kovaçevski.