A do t’i merret Lëvizjes Besa Ministria e Bujqësisë? Hoxha nuk ndjen rrezik nga ndonjë ndryshim të mundshëm

A do të jetë kjo pranverë e nxehtë për ministrat aktualë të qeverisë, që t’i ruajnë kolltukët e tyre në Qeveri.  TV21 nga burime partiake mëson se në maj do të bëhen rokada në ekzekutiv, ndërsa në to nuk do të kursehet as Lëvizja Besa e Bilall Kasamit, së cilët, siç tregojnë burimet, mund t’i merret ministria e Bujqësisë dhe t’i ofrohet ndonjë ministri më e vogël ose ndonjë drejtori.

Ministri i Bujqësisë, Arjanit Hoxha, njëherazi edhe sekretar gjeneral i Besës, informacionet i quan spekulime, ndërsa beson se kanë punuar mirë në institucionet me të cilat drejtojnë kuadrot e Lëvizjes Besa.

 “Kemi realizuar thuajse më tepër se sa projeksionet që i kemi pasur prandaj e shohim veten komod dhe aspak nuk e ndiejmë të rrezikuar nga çfarëdolloj ndryshimi eventual pasi që për pozicionet e Lëvizjes Besa vendosin organet e partisë, si parti që është pjesë e shumicës”, tha Arjanit Hoxha – Ministër i Bujqësisë.

Zëvendëskryeministri Lupço Nikollovski nuk sheh arsye për ndryshime në Qeveri.

 “Qeveria konfirmon se është në rrugën e duhur. Ka mbështetje të plotë në Kuvend. Unë nuk shoh arsye për çfarëdolloj ndryshimesh megjithatë mandatari i Qeverisë është kryetari i Qeverisë, dhe këtë pyetje në ndonjë rast të ardhshëm mund t’ia parashtroni kryeministrit”, potencoi Lupço Nikollovski – zvendëskryeministër. 

TV21 nga burime partiake ka mësuar se partnerët e koalicionit LSDM dhe BDI në fund të majit planifikojnë rikonstruim të Qeverisë. Jo zyrtarisht Televizioni 21 mëson se 2 ministra aktual mund te propozohen për ambasadorë. Gjithashtu mund të ketë edhe rokadë dikasteresh mes LSDM-së dhe BDI-së. Një kryetar aktual komune i BDI-së mund të propozohet për ministër në ekzekutiv. Ndërsa ka shanse të shqyrtohet edhe opsioni i ndërrimit të Ministrisë të Financave me ndonjë ministri tjetër.

Pas telasheve brenda partiake, pritet që në LSDM rikonstruimi të reflektojë udhëheqësinë e re e cila pritet të emërohet në kongresin e 16 majit.  Burimet tregojnë se LSDM nuk do të heq dorë nga përpjekjet për ta bindur Alternativen e Afrim Gashit që të bëhet pjesë e Qeverisë, duke i ofruar udhëheqje të institucioneve, me qellim krijimin e një shumice stabile.